يا جماعة من فضلكم اسمعونى بدون زعل
للى بيحبوا البلد دى واللى جواهم أمل
هل قرأت فى التاريخ يعنى إيه تبنى الأمم
هل قريت كتاب دراستك هل معاك ورقة وقلم
هل ذاكرت هل تعبت هل حَضرت ولا غبت
حسيت فى يوم بالمسئولية جربت شلت؟
فى شعوب حواليك جميعًا أمنت بفكرة
حلوا مشاكلهم بإيدهم نضفوا أدام بيوتهم
حتى ذاكروا علوم كتبهم
ادركوا أن المطر هيرخ بكرة
عملوا زى نوح نبينا بنوا السفينة
الضمير جوه ف قلوبهم ملوش علاقة بأى دين
القضية هيا مبدأ كلهم متمسكين
كلهم مش بعضهم أو شوية منهم
كلهم متمسكين
يا شعوب الدنيا شوفوا شوف وصلنا لحد فين
إحنا فوق الكون ده كله إحنا سابقين السنين
لم يقولوا يا حكومة نضفى وإحنا برده مزبلين
لم يقولوا يا حكومة ابنى مدارس وإحنا برده مخلفين
مهما تبنى يا حكومة إحنا فيها معبيـيـن
لم يقولوا بالعند فيكى هتكفى مين ولا مين
فى الأتوبيس مزنوقين فى الفصول متكدسين
فى الطابور مترصصين فى المحاضرة ملزقين
فوق ده كله زدنا 10 ملايين من البشر فى تلات سنين
اعقلوها انتو وقولولى مصر رايحة لحد فين؟
كلمتين كان نفسى أقولهم يا ولاد بلدنا الطيبين
مواطنين مصريين
لا توجد تعليقات على الخبر
تم أضافة تعليقك سوف يظهر بعد المراجعة