سمير حافظ النواجى يكتب: عفوا يا صغيرى

مات ضميرهم ومات ضميرى
مات ضميرهم يوم ما شافوا
شعب بات من غير لحافه
ولا قالوا عيب ولا حتى خافوا
ــــــــــــــــــــــــــــــــــــــ
ومات ضميرى علشان سكت
وشديت لحافى وقمت نمت

مات ضميرهم يوم ما قالوا
بشار دا قاتل !!! طب ومالوا؟
شعبه يقدر يرد دينه
وبإدييه يطلعله عينه
ـــــــــــــــ
ومات ضميرى لما نسيت
إن سوريا تبقالى بيت
أهلها وزَهرة شبابها
أرضها وسُمرة ترابها
حتى لو بشار خربها
غصب عنى مهما حييت
سوريا راح هتفضلى بيت
ــــــــــــــــ

مات ضميرهم يوم ما قالوا
جهاد فى سوريا !!! طب ومالوا ؟
وراح كمان نسحب سفير
بشار دا قاتل سفاح خطير
ـــــــــــــــــ

ومات ضميرنا لما نسينا
شعب ضاع من بين إيدينا
كل ذنبه إنه بريىء
جا ومَدلنا إيدييه
والذل كان مالى عنييه
واحنا وبكل صفاقه
إرتكبنا معاه حماقه
قام بِذله وراح مهاجر
بس يا خساره الطريق
قالو عفوا يا صديق
اللى وطنه عليه يضيق
إما يغرق فى بحورى
أو يقتله قاطع طريق