خالد صلاح

الندوة التثقيفية تحتفى بفيلم الممر.. الرئيس السيسى: محتاجين فيلم زى ده كل 6 شهور على الأقل.. أحمد عز: "الشعب المصرى وجيشه كيان واحد مينفصلش".. "البسوا المموه بيخافوا منه"..وهند صبرى: شرف عظيم تجسيد زوجة المحارب

الأحد، 13 أكتوبر 2019 02:34 م
الندوة التثقيفية تحتفى بفيلم الممر.. الرئيس السيسى: محتاجين فيلم زى ده كل 6 شهور على الأقل.. أحمد عز: "الشعب المصرى وجيشه كيان واحد مينفصلش".. "البسوا المموه بيخافوا منه"..وهند صبرى: شرف عظيم تجسيد زوجة المحارب أبطال فيلم الممر فى الندوة التثقيفية للقوات المسلحة
كتب محمد عبد العظيم - سمير حسنى

مشاركة

اضف تعليقاً واقرأ تعليقات القراء

أشادت الندوة التثقيفية الـ 31 للقوات المسلحة، بفيلم "الممر" ودوره فى تعريف الأجيال الجديدة، بالدور الذى بذله رجال القوات المسلحة خلال حرب الاستنزاف، وحرب أكتوبر المجيدة، وعرضت الندوة التثقيفية، بحضور الرئيس عبد الفتاح السيسى، مشاهد من فيلم "الممر"، الذى أصبح أيقونة لتضحية رجال الجيش، لدى الشعب المصرى.

 

وأشاد الرئيس عبد الفتاح السيسى، بأداء أبطال فيلم الممر، قائلا: "بشكركم وبقولكم إن الفيلم كان رسالة جميلة جدا، وأداء كل من شارك كان أداء يعكس روح مصرية بتتكلم حتى لو كان بيتكلم باسم غير مصرى".

 

وأضاف الرئيس خلال الندوة التثقيفية الـ31 للقوات المسلحة: "سواء القصة وهى حقيقية وأداؤكم إللى انتوا عكستم بيه كل شرائح المجتمع المصرى فى الوقت ده، وروح المصريين تجاه بلدهم وصلتوها لينا كلنا، وللشباب اللى مشفش ده وعاشه، أتصور التأثر الكبير اللى حصل انتوا عيشتوه الفترة دى".

 

وقال الرئيس السيسى: "أتصور للمخرجين والمنتجين إن التجربة قابلة للتكرار كثيرا، وشوفتم حالة الالتفاف مش للجيش والشعب بس للدولة كمان حالة الالتفاف حول مصر، محتاجين فى ظل اللى بتشفوه والتحديات فى المنطقة ومحاولة سلب عقول وآمال شعوبنا إنه يكون فيه على الأقل كل 6 شهور فيلم زى كده يفكر الناس ويسعدها، اللى انتوا بينتوه فى الفيلم كان فعلا كده فيه ناس مستعدة زى الصعيدى اللى كان بيقول أوريهم إن أنا واقف". 

 

وأكمل الرئيس: "ده رمز لشجاعة المصرى إنه لا يتخاذل أمام التحدى وأى تحدى والرسالة جميلة.. وأشكركم باسمى واسم المصريين وإن شاء الله يبقى فيه فيلم تانى وثالث.. محتاجين كثيرا هذه النوعية من الأفلام مستقبلا.. أشكركم".

 

وأعرب الفنان أحمد عز عن سعادته البالغة فى المشاركة بذكرى انتصارات حرب أكتوبر هذا العام من خلال فيلم الممر.

 

وقال عز خلال كلمته بالندوة التثقيفية الـ 31 للقوات المسلحة بحضور الرئيس السيسي:"احنا سعداء جدا إن احنا بنشارك معاكم فى ذكرى انتصارات حرب أكتوبر بفيلم الممر، والنجاح اللى حققه الفيلم رسالة، وهى رسالة الجمهور والشعب اللى شاف الفيلم إللى أكد على حاجة واحدة مهمة إن الشعب المصرى وجيشه كيان واحد مينفصلش".

 

وأضاف "عز": إذا كنا خلصنا جيشنا من بدرى وبنمتهن الآن التمثيل بس كل واحد من الموجودين لو رجع به الوقت والبلد طلبته أنه يلبس اللبس العسكرى تانى هيكون شرف وفخر"، وداعب الحضور، قائلا: "أيام فيلم الممر تدربنا فى معسكرات الصاعقة، والرجالة هناك قاموا معانا بالواجب وزيادة"، واختتم كلمته بجملة قوية: "البسوا المموه بيخافوا منه".

 

وأكدت الفنانة هند صبرى، أن فيلم الممر يعبر عن تحول إرادة الشعب المصرى من الهزيمة إلى النصر فى حرب أكتوبر.  

 

وأضافت هند صبرى، خلال كلمتها أنه شرف عظيم أن أجسد زوجة المحارب فى فيلم الممر، من خلال تسليط الضوء على معدنها الأصيل، حيث إن المرأة المصرية حصن وسند لبلدها وأهلها.

 

وتابعت الفنانة هند صبرى، المرأة المصرية دورها لا يقل عن دور المحارب وتضحيتها بحبها وإيمانها يقدر يقوم بدوره على أكمل وجه، متابعا: "تحية إجلال وتقدير للشعب المصرى والجيش المصرى العظيم". 

وشارك الفنان الأردنى عمر عبد اللات، فى فعاليات الندوة التثقيفية الـ 31 للقوات المسلحة، بمناسبة احتفالات نصر أكتوبر، حيث أدى أغنية "يحكى أن"، التى أهداها للجيش المصرى، فيما أدى عدد من الفنانين والفرق الغنائية أغانى وطنية عن عظمة الجيش المصرى، وقدم الفنان حكيم أغنية عن الجيش المصرى.

 


مشاركة

اضف تعليقاً واقرأ تعليقات القراء

لا توجد تعليقات على الخبر
اضف تعليق

تم أضافة تعليقك سوف يظهر بعد المراجعة





لا تفوتك
الرجوع الى أعلى الصفحة