صابرين جابر تكتب: إزاى تكون سعيد وراضى؟

لما تقرر إنك تبدأ يومك بسعادة لازم تكون متسامح مع نفسك، الحياة هى مجموعة من التجارب والمواقف، عود نفسك على التجاهل الذكى بمعنى تجاهل مواقف، تجاهل أشخاص، يعنى ما تقفش على الواحدة تتجاهل الإساءة، وده مهم جدا عشان تعيش فى سلام ودايما عشان تكون سعيد ومبسوط .

لازم الواحد يحط نفسه مكان أى شخص يعنى مثلا لو قلت كلمة وأنا عارف إنها هتضايق لازم أحط نفسى مكانه وأعرف كويس إنى لازم أتذوق الكلمة قبل ما غيرى يتذوقها، سواء كانت حلوة أو وحشة ممكن تجرحه ولا لأ، وعشان تبقى مبسوط وسعيد لازم تحسن الظن بالناس بمعنى مش لازم أى حاجة شخص يعملهالك تسيء الظن بيها افرض دايما حسن النية، إلا أن يثبت الظن.

ولازم تعرف وتتأكد كويس إنك مش هتعجب كل الناس ولا كل الناس هتبقى راضية على تصرفاتك، ما تخليش شخص حاول يضايقك بكلمة إنه يفسد يومك الجميل، مش لازم كل الناس تحبك لأنك عمرك ما هتعرف تراضى كل الناس المهم إنك تكون حريص دايما على رضا والديك، وإنك تكون صاحب كلمة طيبة ومعاملة حسنة مع إخوانك وأصحابك ده هيخلى حياتك سعيدة دايما.