"الرجالة بتروح وتيجى واللى باعنا خسر دلعنا" رد فعل الست لو جوزها اتجوز عليها

 

منذ بدء الخلق والمرأة ثابتة على مبادئها لا تتغير رافعة شعار "أنا زى الفريك ماحبش شريك"، وبمناسبة اليوم العالمى للمرأة تجولت كاميرا "اليوم السابع" لاستطلاع رأى السيدات ومعرفة رد فعلهن عند سماع سؤال "هل تقبلين أن يتزوج شريك حياتك بامرأة أخرى أم لا حتى لو كان لسبب ما معلن أو خفى؟.

"اللى باعنا خسر دلعنا" هذه كانت أول جملة قالتها فتاة عشرينية بكل ثقة ردا على السؤال، مضيفة "لازم يطلقنى فورًا، ماقبلش يتجوز عليا، طالما سابنى بقى مش من أولوياتى".

بينما قالت أخرى "ماقبلش حاجة زى دى تحصل، وهيحصل مشاكل كتير لأنه مش هيقدر يساوى بين الاثنين، وأنا زى الفريك ما حبش شريك".

أما أية فقالت "طالما أنا مش مكفياه فى حياته يبقى خلاص يطلقنى وحالًا، مش ممكن أقبل أنه يتجوز عليا حتى لو له أسبابه".

وقالت إيمان، ربة منزل، "لا ماينفعش يتجوز عليا دا أنا هعمل فيه عمايل أموته".

وتابعت أخرى "بنظرية عشان عندى ولاد أحافظ على البيت وأستحمل لا مش ممكن أعمل كده، ماقدرش أتعامل مع حد مش عاوزنى، أنا ست قوية أقدر أعتمد على نفسى وأربى العيال، هقوله طلقنى وخلاص الرجالة بتروح وتيجى قشطة يعنى".

وصممت على نظرة الخلاص من الزوج فور زواجه بأخرى ربة منزل فقالت "بعد ما أربى وأعلم وابنى بيت كبير ييجى هو ويتجوز عليا لا طبعًا صعب جدًا، هموته".

"هموته واشرب من دمه بس كده، جوزى دا كل حياتى، ما قبلش يتجوز عليا" هكذا قالت زوجة أخرى عاشقة لزوجها .

بينما قالت أخرى "الراجل طالما اتجوز على الست يبقى مش بيحبها ماينفعش بعد كده أعيش معاه"، أما "سها" ستفعل ما لا يحمد عقباه، فتتوعد "هيموت فيها".

فيما قالت ربة منزل أخرى "يومه هيكون أسود معايا، والكلمة اللى هقولهاله طلقنى".