خالد صلاح

برعاية سوبر كورة

سوبر كورة

أكد أن طريقة فهمنا للدين وتجديده لن تأتى إلا من بوابة التاريخ واللغة..

خالد صلاح فى "صالون مصر": البخارى ومسلم لم يكونا عربيين ولم يعرفا العربية مثل أهلها فى الكوفة والمدينة.. بعض كلمات القرآن كانت غامضة على الصحابة فما بالك بأحاديث قيلت بلهجة المدينة وانتقلت حتى أفغانستان

الجمعة، 24 مايو 2019 06:21 م
خالد صلاح فى "صالون مصر": البخارى ومسلم لم يكونا عربيين ولم يعرفا العربية مثل أهلها فى الكوفة والمدينة.. بعض كلمات القرآن كانت غامضة على الصحابة فما بالك بأحاديث قيلت بلهجة المدينة وانتقلت حتى أفغانستان خالد صلاح فى صالون مصر
كتب إبراهيم حسان

مشاركة

اضف تعليقاً واقرأ تعليقات القراء

تحدث الكاتب الصحفي خالد صلاح، رئيس مجلس إدارة وتحرير "اليوم السابع"، عن الاختلاف اللغوى بين البخارى ومسلم فى صحيحيهما، وعلاقة ذلك باللغة كضرورة حتمية يجب النظر إليها بدقة، قبل تجديد الخطاب الدينى.

وقال خالد صلاح، خلال برنامجه الإذاعى "صالون مصر"، على إذاعات راديو النيل والتى تضم "ميجا FM، وهيتس، وشعبى FM، ونغم FM": "الإمام البخارى من بُخارى ويستبعد إن بخارى كانت بتنطق عربى فى القرن الثانى من الهجرة ، خاصة إنها مش بتنطق عربى لحد دلوقتى، والإمام مسلم كان من نيسابور وهى فى أقصى شرق إيران يعنى من بلاد فارس وعاش فيها طول حياته، وطبعا بعض الفقهاء قالوا إن هما الاتنين من أصول عربية، معرفش طلعوها إزاى بس أهلا وسهلا.. قالك الإمام مسلم من أصول عربية وقبيلته عربية هاجروا إلى نيسابور!، يعني قطعوا المسافة من الجزيرة العربية اللى في شمال العراق وراحوا أقصى الشرق ناحية أفغانستان يعني حتة بعيدة جدا، ماشي مفيش مشكلة لكن هل كانت مفردات اللغة واحدة؟ أقف عند هذه النقطة كثيرا .. أنا لا بعلق على كلام العلماء فى البخارى ومسلم، ولا بعلق على الأحاديث اللى بعضها مختلف عليه، لكن اللى واقف عنده إن العالِمين الكبيرين ، البخارى اتولد مش عربى وكان بينطق لغة مش عربى، والإمام مسلم نفس الشيئ ، وسياقات اللغة، يعني دلالات اللغة كانت مختلفة، يعني مثلا معنى الكلمات مش واحد".

خالد صلاح فى صالون مصر
خالد صلاح فى صالون مصر

وأضاف خالد صلاح: "إحنا حتى الآن لو نطقنا بالشامى، فيه بعض الكلمات بالشامى تبقى شتيمة لو في مصر، وبعض الكلمات المصري تبقى شتيمة لو في تونس، رغم إن إحنا والشوام والتوانسة بنقول نفس العربى، إلا إنه العربى بتاعنا شكله مش زى بعض ودلالاته مش زي بعض، وبعض الحاجات المجاملة اللى عندنا تبقى شتيمة فى تونس، والحاجات المجاملة فى لبنان تبقى شتيمة فى مصر، وأنا قصدى على كتير من المفردات اللغوية اللى بنضحك عليها فى جلساتنا وإحنا بنتكلم عن اللغة، وإذا كان ده بيحصل فى عهد الفضائيات والإنترنت والمباريات الرياضية اللى بنتخانق فيها مع بعض، طيب الراجل اللى في نسيابور كان بينطق عربى زى الراجل اللى فى بخارى والاتنين بينطقوا عربى زى الراجل اللى فى الكوفه، والتلاتة بينطقوا عربى زى الراجل اللى فى المدينة، أو الراجل اللى في عدن أو سبأ أو غيرها فى المدن اليمنية، دا انت اليمن نطقها غير بقية نطق العالم!".

واستكمل: "خدوا بالكم إنه قد يكون إن اللغة ودلالات اللغة اللى كان بيتكلم بيها واحد زي البخارى وواحد زي مسلم مختلفة عن اللغة اللى كان بيتكلم بيها ناس فى المدينة وناس فى الكوفة اللى جمعوا منهم الحديث، وخلوا بالكم من ده إنه ممكن يفتح الباب باللغة لكتير جدا من التأويلات، لأنه فيه حاجات مش بتبقى مفهومة، وفيه حاجات يقولك بيرويها بأكتر من رواية، ويقولك هو يا قال كده! يا قال كده! أو يا رواها كده! يا رواها كده!، وده بيفتح كتير من أبواب التأويلات والريبة والشك وأبواب إعادة النظر في التواريخ اللى اتكتب فيها الكلام ده واللغة اللى اتكتب فيها، لأن اللغة مكنتش شبه بعضها، لاحظوا إن المناطق الشامية كانت بتتكلم آرامي والعرب هما اللى نزحوا باللغة العربية على هناك، ولاحظوا إن المناطق الفارسية لغتها العربية مش زى اللغة العربية السليمة".

وتابع "الأجواء دى كلها فى سنة 200 هجرية، حصل فيها عمليات جمع الأحاديث وحصل فيها الصراع حوالين جمع الأحاديث، لأن أنا النهارده لما أجى أقف وأقول يا ربي.. قضية اللغة قضية كبيرة جدا، وانت عندك فى القرآن الكريم الآية اللى بتقول (تِلْكَ إِذًا قِسْمَةٌ ضِيزَى) فى بعض الصحابة قالوا مش عاوزين نعرف "ضِيزَى" يعني ايه وما كانوش عارفين المعنى يعني ايه، لكن هو إحساسه بيها إنه كلام من عند ربنا، فإذا كانت بعض كلمات القرآن فى محل عدم معرفة لدى الصحابة، فما بالك بأحاديث قيلت فى المدينة على ألسنة ناس هاجروا من مكة إلى المدينة، عاشوا بين اليمن والشام فى رحلات الشتاء والصيف، نقلوها لناس فى بخارى وسمرقند ونيسابور.. عاوز تقولى اللغة كانت واحدة وإن الفهم كان واحد، لأ.. مش هينفع.. اللغة كان فيها مشكلة، وعلشان كده في معانى وصلتنا مش دقيقة".

واختتم خالد صلاح: "وإذا أردنا تدقيق علم الحديث وأردنا أن نصحح ونقيم ما جرى فى البخاري ومسلم، لازم نبتدى من اللغة، وإلا قولى سبب واحد، هو ليه الإمام مسلم رغم إنه تلميذ الإمام البخاري قرر هو كمان يكتب صحيح اسمه صحيح مسلم، ليه ما اكتفاش بصحيح أستاذه الإمام البخارى وكتب هو صحيح مسلم، إلا إذا كان هو شايف فى حاجة ليها علاقة باللغة أو عملية الجمع اللى قام بيها البخارى فى هذا التوقيت، خدوا بالكم دراسة التاريخ مهمة زي دراسة الفقه، وطريقة فهمنا للدين وتجديده مش هتيجى إلا من بوابة التاريخ واللغة، وهل تصدق إن 2 متربيين فى مناطق مش عربى فاهمين عربى يعني أحسن من العرب؟!".


مشاركة

اضف تعليقاً واقرأ تعليقات القراء

الموضوعات المتعلقة


التعليقات 9

عدد الردود 0

بواسطة:

مسلم

قبل الحكم

اقراء سيره البخاري ومسلم قبل حكمك عليهم كانوا يتحدثون العربيه أفضل اي عربي لماذا هذا كل هذا الحقد علي البخاري ومسلم أن كانوا علي خطأ هل علماء زمانهم كانوا ليسكتو ا عليهم البخاري ومسلم شهد لهم ائمه زمانهم ومابعد زمانهم الي الان غير الذي في قلبه مرض

عدد الردود 0

بواسطة:

Mosafa

من تكلم في غير فنه أتى بالعجائب

للاسف المنشور به كم كبير من المغالطات في علم الحديث لعلك تجعل كل صاحب فن يتكلم في فنه ودع علم الحديث إلى أهله .

عدد الردود 0

بواسطة:

ماجد

ابي بكر و عثمان بن عفان

عاوز سبب واحد ليه مسلم مع انه تلميذ البخارى لم يكتفى بصحيح البخاري و كتب صحيح مسلم ؟ قولى انت الاول ليه عثمان عمل مصحفه و لم يكتفى بالمصحف اللي جمعه ابى بكر ؟ نفس السؤال و نفس المنطق .

عدد الردود 0

بواسطة:

أبو الشيماء

اسأل أهل العلم

المعنى موجود فى جميع التفاسير .أقرأ التفاسير وان لم تجد فمن الواجب أن تسأل أهل العلم ان كنت لاتعلم وتريد التعلم . تفسير ابن كثير : تِلْكَ إِذًا قِسْمَةٌ ضِيزَىٰ (22) فلو اقتسمتم أنتم ومخلوق مثلكم هذه القسمة لكانت ( قسمة ضيزى ) أي : جورا باطلة ، فكيف تقاسمون ربكم هذه القسمة التي لو كانت بين مخلوقين كانت جورا وسفها .

عدد الردود 0

بواسطة:

طبعا درسوا العربية وحفظوا القران وهما يعرفوا العربية الفصيحة وانت تقصد التشكيك اكيد اتق الله

جبال لن نصل اليهم واختارهم الله

لا حول ولا قوة الا بالله

عدد الردود 0

بواسطة:

Osama

بلاش تشكيك وفتي

يااستاذ خليك في الصحافه واترك الدين للمتخصصين

عدد الردود 0

بواسطة:

سعيد

مش شغلتك

ياأستاذ خالد لو سمحت خليك في شغلك ومش علشان بقيت صاحب قلم تكتب في كل علم وكل فن --- فيه أهل تخصص يتكلموا فيه -- كلامك في حق الامام البخاري ومسلم مرفوض جملة وتفصيلا -- انت اتكلم في مشكل الطرق العيش ومش شغلتك تتكلم وتجرج في علماء الدين ... أرجوك ركز في تخصصك

عدد الردود 0

بواسطة:

د صابر الصاوی

رد علی الاستاذ خالد صلاح

هذا المنطق للحكم علی البخاری ومسلم فی علمهم باللغۃ العربيۃ غير سليم لان هوءلاء رجال وهبوا حياتهم لدين الله حسبۃ لله وليس لای غرض اخر فبارك الله لهم فی اوقاتهم واعمارهم ثم ماذا تقول عن سيبويه وهو ليس عربيا ولو قرا مقالك عفوا يااستاذ صلاح لاخرج منه اخطاء لغويۃ غير قليلۃ الم تعلم ان رسول الله صلی الله عليه وسلم طلب من سيدنا زيد بن ثابت رضی الله عنه ان يتعلم العبريۃ ليرد علی رساءل اليهود فتعلمها فی سبعۃ عشر يوما ورايت بعينی طلبۃ غير عرب من افريقيا واسيا واوربا بل وامريكا يتقنون اللغۃ العربيۃ فو زمن قياسی اسرع من طلبۃ مصريين وعرب فی جامعۃ الازهر فرفقا بسنۃ رسول الله صلی الله عليه وسلم لان الله عز وجل قد تكفل بحفظها كما تكفل بحفظ القران الكريم لانها مبينۃ له يقول تعالی وانزلنا اليك الذكر لتبين للناس فكما حفظ المبين بالفتح فقد حفظ المبين بالكسر بواسطۃ هولاء الرجال رحمهم الله وجزاهم خيرا عن امۃ الاسلام

عدد الردود 0

بواسطة:

أبو العباس المستعز بالله

الإمام مسلم رحمه الله من قشير

الإمام مسلم رحمه الله من بني قشير بن كعب بن ربيعة بن عامر بن صعصعة بن معاوية بن بكر بن هوازن القبيلة القيسية المضرية العربية الشهيرة فكيف لا يكون من العرب؟؟!! ولكن هل خالد صلاح من العرب وهل هو أفصح مِن مَن كانت العربية الفصيحة لغته الأم ثم إنه نشأ في بيت علم وتتلمذ على يد البخاري و غيره من الشيوخ أما الإمام البخاري رحمه الله فقد كان من غير العرب لكنه نشأ في بيئة عربية كانت اللغة الأم فيها العربية دونما سواها و شيخه الإمام أحمد بن حنبل من بني بكر بن وائل من ربيعة بن نزار بن معد بن عدنان (عربي أصيل)  فلو وجد في تلميذه اعوجاجا لقومه 

اضف تعليق

تم أضافة تعليقك سوف يظهر بعد المراجعة





لا تفوتك
الرجوع الى أعلى الصفحة