بدأت فيروز حديثها لكاميرا "فيديو 7"، عن بدايتها كسيدة بمؤهل متوسط تبحث عن عمل لتلبية احتياجاتها الأسرية فوجدت في العمل الحر فرصة كبيرة لتحقيق ما تتمناه بعكس الوظيفة، فقررت أن تساعد السيدات العاملات بطريقة غير مباشرة من خلال تجهيز الأكل وبيعه لهن خلال عودتهم من العمل.
"فيروز" سيدة من الإسكندرية بـ" 100راجل"، فكرت خارج الصندوق وقررت العمل في الشارع من خلال تجهيز الأكل المنزلى بكل الأصناف والأنواع، قائلة، "أنا ست عادية جدا، معايا مؤهل متوسط، بحب الناس وبحب شغلى وبحب الحياة، الفكرة جاتلى من خلال الاحتياج المادى بس مؤهلى مش هيجيبلى فلوس لأنه دبلوم تجارة هشتغل بيه ايه، فكرت أنى أساعد وأتساعد، بمعنى أن ستات البيوت الفئة التي تعمل مثل الدكتورة والمهندسة وغيرهما محتاجين حد يساعدهم بحاجة جاهزة أو نص جاهزة من الأكل".
وتابعت: "بدايتى كانت عبارة عن أكياس شنط مليانة خضار وأكل، وكنت بروح أوزعها على المدرسات، وبدأت أتعرف بين الستات العاملات لحد لما وصلت لمرحلة أنى بشيل كميات كبيرة جدا على إيدى كل يوم، لاقيت أن الموضوع بقى صعب جدا عليا فقررت إنى أجيب عربية صغيرة على قدى بس مكنتش بعرف أسوق وقتها، جوزى علمنى السواقة ووقف جنبى ربنا يكرمه وديه معضلة لأن مفيش ست جوزها بيعلمها السواقة، وكل لما أقول لزمايلى كده يقولولى مستحيل فى زوج بيعمل زوجته السواقة".
وأردفت: "أول عربية اشترتها كانت بـ 3000 جنيه، وكانت شنطتها من قدام، وبعدها غيرتها وجبت العربية اللى معايا ديه، جوزى هو كل حاجة فى حياتى اللى بلاقى معاه الطبطبة، بقول لكل الستات من أراد استطاع، المهم أننا نحلم ونسعى وهنوصل لحلمنا وحلمى إنى يكون عندى مول كبير ابيع فيه الخضار للستات العاملات عشان أريحهم من مشقة الشغل وأكل البيت".
تم أضافة تعليقك سوف يظهر بعد المراجعة