القارئة ياسمين العبساوى تكتب: ابنى بيسرق

ابنى بيسرق ؟

ابنك عنده كام سنة؟

هيفرق فى إيه عنده كام سنة؟

هيفرق إن الطفل لغاية سن 6 سنين مابيكونش عنده مفهوم الملكية مكتمل وبيبدأ المفهوم دا من سن ال 6 سنين انه يتكون ويفهمه بشكل أفضل.

بس هو فاهم إن دى مش بتاعته

أيوا هو عارف إنها مش بتاعته بس هو لسه ماوصلش لمرحلة النضج اللى تسمح له يدرك أن مش من حقه ياخدها

بس إحنا مش حارمينه من حاجه.. كل حاجة بنجيبهاله.

أسباب السلوك دا عند الطفل كتير منها:

1- الحرمان : إن بيئة الطفل تكون فقيرة لا تستطيع توفير متطلباته التى يرى أقرانه من نفس سنه يتمتعون بها .. أو أن تكون بيئته رافضة لكل شىء يريده.

2- وجود صداقات من بيئة اجتماعية أعلى من الطفل فيشعر الطفل وسطهم بأنه أقل فيرغب فى تغيير تلك الصورة ومجاراتهم.

3- عدم وجود صداقات للطفل أو مهارات اجتماعية كافية لتكوين صداقات فيلجأ إلى أن يأخذ المال لشراء الحلوى لتوزيعها على الأطفال حتى يتقربون منه.

4- العنف الأسرى: وهنا الطفل بيمارس السرقة للانتقام من الأب والأم .

5- عدم استيعاب الطفل لمفهوم الخصوصية والملكية.

6- عدم تعليم الطفل الخصوصية واحترام ملكية الآخرين.

7- عدم تعليم الطفل مهارة إدارة المال وان كان بسيط.

طيب أنا هتصرف إزاى؟

فى حاجات لازم نتبعها منها:

1- احترام ملكية وخصوصية الطفل حتى يتعلم ذلك، فمثلا علينا أن نستأذن إذا أردنا استخدام متعلقاته، حتى وإن اصطنعنا المواقف كى نعلمه ذلك لأن الطفل مش بيتعلم بالكلام بيتعلم بالافعال.

2- يجب أن يحدد للطفل مصروف يومى يأخذه ويقضى به يومه، فكثيرا من الآباء يعطون الطفل مصروفا يعود من المدرسة بدونه فيعطونه مرة أخرى وأحيانا مرتين.. فالطفل له مصروف واحد يوميا وليس 2 و 3 حتى يتدرب على إدارة مصروفه الصباحى على مدار اليوم يوما بعد يوم.

3- تدريب الطفل على الادخار وتشجيعه على ذلك.

4- اهتمى بأنك تعلمى ابنك العطاء، بأنك تشوفى مع ابنك لبسه اللى صغر عليه ولعبه اللى مش محتاجها وتخليه يديها لطفل تانى محتاج ، وأنه يقدم هدايا بسيطة زى كارت لأصحابه أو اخواته فى أعياد ميلادهم.

5- ماتناديش ابنك بمسميات سلبية زى انت حرامى، لكن قولى انت ولد كويس والسلوك دا غلط ازاى ولد كويس يعمله؟

6- اهتمى بغرس القيم الدينية عند ابنك واستخدمى فى ذلك القصص التى تتحدث عن الأمانة وغيرها من الصفات الحميده.

7- خلى كلامك ايجابى اهتمى بالكلام عن الأمانة والجنة مش السرقة والنار، وضحى مفهوم السرقة لكن الأساسى الأمانة.

8- ماتحرجيش ابنك قصاد حد وتطلعيه ولد مش كويس علشان اتكسفتى قدام حد، لما ياخد حاجه اتكلمى معاه وخليه يروح يرجعها بهدوء، ولو الحاجه دى بتخلص زى أنها تكون حاجه بتتاكل ممكن يجيب لصاحبها حاجه تانيه بمصروفه.

9- اهتمى بعدم وجود اموال سهل الحصول عليها أمامه بل احتفظى بها جيدا بعيدا.

10- انتبهى واتعرفى على أصحاب ابنك بشكل جيد.