قال الشاعر السيناوى عبد الكريم الشعراوى، إنه تم الانتهاء من أحدث عملين فنيين عن سيناء والوطن والانتصار والتحرير وبدأتا فى الظهور مع حلول ذكرى انتصار العاشر من رمضان السادس من أكتوبر وذكرى تحرير سيناء.
وأوضح الشاعر عبد الكريم الشعراوى فى تصريح خاص لـ"اليوم السابع"، أن العملين الفنيين من كلماته، موضحا أن "أوبريت طير السمان" بدأت فكرته قبل 4 شهور بطلب من الفنان السيناوى "حسام فيكا"، الذى قال إنه يريد كلمات لأغنية تظهر فى أعياد تحرير سيناء ويقوم بتلحينها.
وأضاف أنه تم الاتفاق أن تكون الكلمات تربط بين الماضى والحاضر، وبطولات أبناء سيناء والجيش والشرطة ونظرة تفاؤلية لمستقبل التنمية فى شمال سيناء، وبعد ساعة واحدة كانت كلمات القصيدة جاهزة.
وهى :
ياطير السمان يامروح
حود على العريش
ع الناس اللى فى عيدها بتفرح
والشرطة والجيش
صابرين ع الغمة وانزاحت
والايام الصعبة اهى راحت
والعيشة يابلدنا اهى طابت
دومى ياسينا ومصر تعيش
الارض اللى ترابها ياقوت
تمرض حبة لكن ماتموت
شعبها وقت الجد فداها
مهما يابلدى العمر يفوت
ولا ارهاب ولا اى تحدي
اهى كانت ايام وتعدي
أنا مصرى سيناوى ومين قدي
قلبى وربى بعلو الصوت
باحلم بيكى ياسينا سفينة
علشان جيلنا واجيال جاية
وهتفضلى دايما فى عنينا
بوابة مصر الشرقية
هنحول صحاريكى مداين
وهاترسى على المينا سفاين
رمل الشط هايبقى جناين
وهايرجع طيرك للغية
شعبنا وقت الشدة جنود
كله تحدى وكله صمود
شهداءنا احياء فى الجنة
ومسير الايام هاتعود
المنسى عايش فى قلوبنا
ووطننا الغالى فى عيوننا
مصريين وبكل جدارة
بلد العزة وبلد الجود
عدى كتير يابلدنا وهانت
علامات المستقبل بانت
بلد المجد الحسنة وشاهدة
على بلدى اللى ماعمرها خانت
لسه الاحلام فيكى بتكبر
وبلدنا للمجد بتعبر
والشعب اللى اتعود يصبر
هايحقق كل الاحلام
ياشباب ياللا الايد فى الايد
نصنع بكره بفكر جديد
فن وعلم أدب ورياضة
نبنى بلدنا ليوم العيد
نرسم ونأسس ونعلي
رافعين راسنا لاعلى تماللي
ياللا يانسمة فجرنا هلي
قولوا يارب الخير هايزيد
وأضاف أن العمل الفنى تم إنجازه ما بين القاهرة والعريش بدعم ورعاية من ابن سيناء "كمال نبيل الاهتم"، وقام بالألحان والغناء "حسام فيكا"، والمطرب الشعبى عمر كمال وتم تصويرها فى مدينة العريش .
وأضاف أن أغنية "حكاية سينا" كلماتها من قصيدة من أوائل أعماله الأدبية بالعريش فى عام 1985 بطلب من الموسيقار عبدالرحمن البيك والمخرج المسرحى الفنان زكى العكاوى وكانت من ضمن أكثر من ثلاث أغنيات وتغنت بها كل الأجيال من فرق طلائع شمال سيناء.
وتم هذا العام فى جديدها أن تحولت لأغنية أداها المايسترو "خالد الشعراوي"، وألحان عبد الرحمن البيك وتقول كلماتها :
الحكاية حكاية حته
غاليه عندى وعند مصر
جت عليها ايام طويلة
وقعت فيها سنين فى الأسر
مصر الام مهنش عليها
يوم تتهنى وسينا بعيد
بعتت اغلى شباب يفدوها
زاحوا الضلمة وجابوا العيد
زى النهارده.. والدنيا شاهدة
رجعت سينا لحضن الام
رجعت امان.. نسيت زمان
نشفت فيها بحور الدم
والحكاية حكاية حتة
غالية عندى وعند مصر
والنتيجة احياء جديدة
كل مكان بقى فيه تعمير
مية وخضرة مكان الصحرا
شط ونخل يرشوا عبير
هى دى كل الحكاية بس مش هى النهاية
علشان لسه الخير هايعم
بعد ماضمنا حضن الام
والحكاية حكاية حتة
غاليه عندى وعند مصر
الشاعر عبد الكريم الشعراوى
الفنان خالد الشعراوى
الفنان والملحن حسام فيكا
تم أضافة تعليقك سوف يظهر بعد المراجعة