مفيش حد فينا يقدر ينكر – بالذات الجيل اللي زينا اللي شاف كتير – انه بيشتاق ليوم واحد من أيام زمان. اسال أي حد هيقولك ياااه – بالمد الطويل في الألف – دي كانت أيام. ونقعد نتبادل الذكريات والأحداث وأد ايه الأيام كانت جميلة والمجتمع والحياة والناس ونتقمص شخصية الفنان عبد المنعم مدبولي ونغني معاه "زمان زمان وليالي زمان."
ماحدش فينا يقدر ينكر اننا كنا عايشين حياة أحسن بكتير. هدوء وروقان، فسح وخروجات، فرحتنا بحاجات صغيرة ومش غالية ولا فخمة، لمتنا مع بعض علي الأكل أو مسلسل الساعة 7، فطار يوم الجمعة وسر الأرض وعالم الحيوان، سهرة يوم الخميس علي تاكسي السهرة، مرواح البحر كل يوم الشارع اللي ورانا – كوني اسكندرانية بقي وكدة – ونرجع اخر اليوم وشنا من غير صن بلوك ولا غيره واحنا فرحانين وفخورين بحرقتنا، فرحتنا بيوم الخميس أيام الدراسة علشان هنام متأخر شوية النهاردة وهنلعب.
لو قعدت اكتب في كل الحاجات الي كنا بنعيشها واحنا صغيرين واحساسنا وروحنا وضحكتنا الي كانت بتطلع من القلب – الضحكة الي بتفضل تكح بعدها نص ساعة دي ودموعك تنزل معاها – أكيد مش هيكفيني مجلد.
طيب ايه الي حصل دلوقتي؟
ليه الاكتئاب زاد والشكوي زادت؟
ليه الكل بقي مكشر والضحكة عزيزة قوي؟
ليه مفيش استمتاع بأي حاجة في الحياة حتى لو كانت أفخم الاماكن وأغلاها؟
ليه الشكوي زادت من غدر الناس وظلمها وقسوة الظروف والأيام؟
تفتكر الدنيا الي ربنا خلقها اتغيرت؟ بص كدة علي كل حاجة طبيعية ربنا خلقها هتلاقيها زي ماهي مفيش حاجة فيها اتغيرت. طيب يبقي ايه الي اتغير خلانا كدة؟
ببساطة أقدر أقولك العامل الوحيد الي اتغير هو أنت. أيوة. الانسان.
الانسان هو الي اتغير في كل صفاته وحياته وتطلعاته وتفكيره وكل حاجة. تغيير الانسان بيؤدي لتغيير الحياة كلها.
طيب هل التغيير ده ممكن يخلينا نفضل عايشين في الحالة دي ولا نحاول نرجع لحالتنا القديمة أحسن؟
بعد السؤال ده هقولك تاني عنوان المقال "قول للزمان ارجع يا زمان". مفيش زمان بيرجع لورا دائماً الزمن بيمشي لقدام بس. عمرنا ما نقدر نتحكم في الي فات، لكن نقدر نتحكم في الي جاي.
أول حاجة، لازم نتقبل التغيير لأنه سنة الحياة ومانحاولش نعيش بعقلية زمان دلوقتي، أو الأسوأ اننا نفضل حابسين نفسنا في روح زمان لحد دلوقتي ساعتها هيبقي عندنا مشكلة اننا مش عايشين زمان ولا عارفين نعيش دلوقتي وهنا هتحصل فجوة كبيرة في الزمن عندنا ورفض للواقع وهوصل للاكتئاب الي الكل واصل له دلوقتي.
طيب نعمل ايه؟
مش هقولك اعمل اصح زي أستاذ غسان مطر. هقولك تقبل التغيير في كل حاجة حواليك وتعامل معاها بروحك القديمة.
ايه الفزورة دي؟!!!
ببساطة جداً.
الزمن اتغير، أشكالنا اتغيرت، طوحاتنا اتغيرت، علاقاتنا اتغيرت وهكذا. تقبل ده واتعامل علي أساسه لكن خلي جواك روحك القديمة بتاعت زمان الي بتخليك انسان قادر يستمتع بالحياة وكل ما فيها. ماتبقاش ساذج في علاقاتك بالناس بس لما تقابل حد يستحق تعامل معاه بروح الود بتاعة زمان، ابني ذكريات ليك ولعيلتك مناسبة للزمن الي احنا فيه، اشتغل بطريقتك انت وضميرك وابعد عن التطبيل والأسافين بس برده تخلي بالك كويس من الي بيعمل كدة وتعرف تتعامل وهكذا.
عيش دلوقتي بروح زمان. عيش انسان مبسوط وسعيد مهما كانت السنة الي انا عايش فيها. تقبل سنة الحياة.
عدد الردود 0
بواسطة:
رانيا محسن
موفقة
برافو عليكي حلوة جدا بالتوفيق يارب