ننشر قصيدة شعر عامية جديدة بعنوان " قصيدة حُب طردى" لـ الشاعر أحمد خالد.
لسه بدرى
مهما بان فى السكة زحمة
مهما شنكلنا الغلط
مهما هتحاوطنا عتمة
وارتباك بعد الخطط
فيه إيدين حَسْباها رحمة
فيه إيدين ماسكة الزلط
فيه إيدين بتمدّ حكمة
فيه إيدين حاضنة اللَّبَطْ
وانت تقدر تبتسم
كل طعنة جوة قلبك ليها وردة
كل تجعيدة فى روحك ليها فَردة
كل دمعة ليها سجدة
فرحة تيجى بعد شِدّة
مهما بان الحلم أصعب
والحياة تشبه لخردة
مهما قالوا إن الدفا صعب يجي
والأيادى لسه باردة
حتى لو رح تمشى وحدك
إمشِ وحدك
حتى ممكن تبقى ليك سَندة ايديك
أقوى سَندة
تبتسملك بنت أجمل من زهور نابتة ف هولندا
التراب لو شافها يعمل نفسه فضة
الزعل ف كفوفها يرضى
إمشِ وحدك
تلقى شمسك فى الفراندا
تلقى فى الماشيين راياتك
وجناحاتك فى سما حاضنة الطيور
اللى كان بهتان يزهزه
واللى خاف.. الآن جَسور
الغياب يصنع حضور
والحضور م المستحيل ياخدك غياب
سيب فى كل خناقة باب
سيب لربك المحاكمة والحساب
للى خانك واللى عاب
واللى إسمه فى الكتاب جِه قبل اسمك
إنت تقدر تبتسم تقدر تنافسك
تبقى أفضل نسخة منك
إنت جِنّك
بس إياك تنصرف
تمشى ف عنيك الأسف
وف عروقك سلك شائك
إنت ضاحك
إنت ساخر
مهما فات قطر وبواخر
أولك يا صاحبى آخر
يكفى إنك لسه ضيّْ
لسه قادر تبقى حيّْ
ترمى نكتة فى كل شارع
ترمى ضحكة فى كل حيّْ
تهدى ودنك حتى لو جتلك بشكوى
تسقى نبض الرحلة سعي
لسه بدرى
الغوامق قد تجيب فى اللوحة وردي
الحواجز قد تسيب حلمك يعدى
الشايات مش مستحيل تاخد مكان كاس البراندي
والطرق اللا تؤدي
قد يجيلها اليوم تؤدي
لسه بدري
بعد كل الحزن ممكن نلقى حُب
حب طردي
لسه بدري
تم أضافة تعليقك سوف يظهر بعد المراجعة