من يحمى مصارعة المحترفين؟!

غريبة حبتين.. مباريات مصارعة محترفين تقام فى الصالة المغطاة باستاد القاهرة وفيها نجوم أجانب.. وأصحاب الليلة برضه أجانب.. ومعاهم شركاء مصريون!!

بس مش دى اللى غريبة الحبتين اللى قلنا عليهم.. إنما الغريبة أن تقام المنافسات ويحضر جمهور.. ويتم تأمين المباريات، ولا يحدث ما يعكر الصفو!

حضراتكم مش معايا برضه إنها غريبة.. ربما أكثر من حبتين!
إيه يعنى وقت ما يريد الناس اللى فوق التأمين.. يتم التأمين!

يا سادة قولوا لنا كلام مفيد.. بدءا من الاتفاق.. مروراً بالمؤتمر الصحفى.. انتهاء بالحضور الجماهير.. وكله.. كله تمام، زى شكة الدبوس!

بكل تأكيد فيه إرادة إن البطولة دى تقام هنا فى القاهرة.. وفيه إرادة كمان أن تتم العملية «مصارعة» فى أمان.. فيتم التأمين!

قولوا لنا يا ناس هو فيه إيه بالظبط ولا عشان دولم مصارعين يعنى.. وأرجو أن ماحدش يقول إن الألتراس وافقوا على لعب المصارعة.. لأن المصارعة والعياذ بالله فرحة.. والفرحة مكروهة.. لكن لازم نفرح أولاد الناس التانيين بتوع التذاكر اللى بـ«3000» جنيه بس!

بالمناسبة عايزين نعرف.. موضوع اتحاد الكرة فى حالة انعقاد دائم لحين إصدار قرار بعودة كرة القدم.. طيب.. الجبلاية منعقدة دائم ليه؟ إذا عرفتم الحل.. نرجوا إن ماحدش يقوله لأى حد.. لأن مافيش حد فاهم حاجة.. يبدو أن التأمين إرادة شعب.
شكرااااً.