يعنى برادلى بيحب مصر أكتر منكم؟!

هل يعلم مسؤولو كرة القدم ومسؤولو الدولة المصرية، أن منتخب مصر بتاع الكرة دى أن يظهر منهم ويعتبروها «رجس من عمل الشيطان».. بس مش مهم لأن الشيطان ممكن حال مصر يصعب عليه!

الأفاضل دولم ودولم مش واخدين بالهم أن فرقة الكورة بتلعب.. آه بتلعب.. بس يا سادة ده لعب باسم مصر.. وحتى علم مصر بـيرفرف بسبب الكورة.. أهو على الأقل نشوف العلم بدل حكاية الأعلام من كل شكل ولون اللى بنشوفها مرفوعة فى الميادين!

يا حضرات، منتخب مصر فى حاجة إلى أحد أمرين.. إما أن تعيدوا لعب الكرة.. وده براحتكم طبعاً!

أو فيه حل تانى.. إعداد برنامج تدريبى يرضى طموح الأمريكى برادلى.. الراجل الى بيقاتل علشان مصر بشكل غريب!

البرنامج فقط حضراتكم تحاسبوا عليه من فلوس المصريين.. لكن الإعداد الفنى للبرنامج لازم يكون من صنع الخواجه برادلى.. يعنى تشوفوه عايز كام مباراة ويتم توفيرها فوراً.
يا سادة إيه فايدة تحويش الفلوس، وإنكم تطلعوا قال إيه ولم تصرفوا مليم يعنى ناس كويسة والحمد لله، لكن المنتخب لازم يوصل كأس العالم بالبرازيل ودى مفيهاش كلام لابد منها وأوعوا تفتكروا إنها مش مهمة لكنها هتبقى مشكلة المشاكل.

حضرات الأفاضل سواء فى اتحاد الكورة أو الدولة لازم تعرفوا أن الخروج من كأس العالم تعنى نهايتكم لأن الشعب مغبون لن يسكت عن فرحة كبرى لو وصلنا لكأس العالم، لأن الإخفاقات المتعددة والمتكررة فى كل مراحل الحياة بقت شىء صعب.

صدقونى لن نسكت على ما يحدث لكننا صابرون حتى نرى ما ستقدمونه، بعدها سيكون لنا كلام تانى وساعتها مش بس ألتراس، لا ده كل المصريين هيكونوا فى الشوارع للمطالبة برؤوسكم.. مفهوم طبعاً.. وقد أعذر من أنذر.. وشكراً.