فجأة تحولت كل الاتجاهات بمجلس الجبلاية نحو الخنوع وسمع التعليمات وتنفيذها!
ياريت حضراتهم يقولوا لأى مواطن من الملايين التى كانت تنتظر عودة النشاط وبالتالى ستر البيوت، لكن فجأة تخرج جماعة «الجبلاية» ليؤكدوا رأى الجماعة أن الكرة رجس من عمل الشيطان وإنه مفيش مشاكل خالص لو الكرة لم تعد.. بيقولوا لحضراتكم البلد أهم!
بصراحة كدا اللى شايف إن البلد أهم.. اللى إحنا مش فاهمينها.. يعنى إيه أهم، ومع ذلك اللى عاوز يروح يراجع الحد الأدنى والحد الأقصى للأجور يتفضل يروح، اللى عايز يروح يشوف ليه القطارات فقدت صوابها يتفضل يروح، واللى عايز يروح يشتغل رئيس حى يتفضل يروح، واللى عايز يربى ذقنه.. أو يركب ذقن بردو يتفضل يروح!
الحقيقة إن الأداء فى الجبلاية لا يرضى عدوا ولا حبيبا خاصة بعدما خرج علينا الدكتور عفت السادات بتصريح خطير قال فيه إن الأندية لن تترك الأهلى يشارك فى أى مسابقة لأن جماهير إسكندرية وبالتالى جماهير مصر ستقتحم الملاعب.. على ما يبدو إن الرجل ده له حق، كل دا بيحصل والأفاضل فى الجبلاية فى انتظار صورة حتى ولو مقاس صورة البطاقة مع أى مسؤول يتحدث المسؤول وهم قاعدين كأنهم أخدوا تذاكر مجانى!
حتى كتابة هذه السطور أعزاءنا القراء هنعتبر إننا مخليين الطابق مستور.
الستر دا مش هايدوم كتير وهنضطر نقول لأصحاب الملك اللى هما الشعب مين بيقعد مع مين ومين يتسرب تحت جنح الظلام لينال الرضا العام. ومين بيفكر يشترى سبحة أو يربى «سكسوكة»، ومين بيقدم قرابين وبيدفع عشان يربى الهتيفة بتوع الانتخابات البرلمانية والدستورية اللى جايه!
يا أهل الجبلاية بلاش طريقة الصلح خير.. والبنت مالهاش غير بيت جوزها، وقولوا كلام نهائى، الدورى راجع ولا أى قطر الفيوم.. اللى خايف يروح.. اللى خايف ومش هيروح فعلا فعلا هيزعل جدا.. وشكرا.
مشاركة
اضف تعليقاً واقرأ تعليقات القراء
مشاركة
