حلو.. وعباس.. ليه صدقته

السيد الفاضل ممدوح عباس رئيس نادى الزمالك.. تحية طيبة وبعد.. نعرفكم أن الثورة قامت والحمد لله يوم 25 يناير 2011.. ومن يومها حضرتك والناس فى مصر كلها قررت أنه لم يعد هناك أى أحد فوق القانون، ولا له نفوذ يسمح له بأن يستغل، وكمان فاضل حاجة واحدة أقولها لحضرتك، الناس فى مصر عارفة كويس أنك لم تعد مسنودا، ولا حاجة ولم يعد هناك لواءات يمكنها التنكيل بأى مواطن تسول له نفسه أن يقول كلاما لا يعجب جناب حضرتك!!
سيادة ممدوح عباس، أود أن أعرفك أيضاً أن حكاية «العزبة البيضاء» اللى أنت مفهم الناس كلها أنك اشترتها بفلوسك انكشفت، خاصة أننا فى شهر إبريل والعياذ بالله!

كمان سيادتك الناس بتقول: لو «عباس بك الأبيض» اشترى العزبة البيضا، طب ليه عليها ديون؟!

الناس كمان بتقول لسيادتك أوعى تنسى أن جمال ابن الرئيس اللى خلعوه، كان فاهم أنه اشترى عزبة أكبر من عزبتك وشوف يا باشا هو فين دلوقتى، ربنا يسترها عليك وتقدر تخلع من شوية المشاكل اللى عليك، وحبايبك كلهم يبدعوا لك بالستر! يا بيه.

بس الحبايب برضه بيقولوا لك بلاش عنجهية على الفاضى، وأوامر من نوع منع خلق الله من دخول عزبتك، اللى هى مش عزبتك طبعاً ولا حاجة!

قصر الكلام وختامه.. حاول ترتجع عن الأفعال اللى دبسك فيها أبوالنجا، وأبوالليل، وأبوجلبمو، لحسن اللى جاى وحش خالص يا بيك وبلاش تخللى البشر تقول: حلو وعباس ليه صدقته.. وشكراً.