أب يقتل نجله بالرصاص بسبب سوء سلوكه فى سوهاج.. المتهم: "والله ما كان قصدى أموته لكن هو أخذنى بالقوة علشان أسحبله فلوس من الفيزا".. و"كان ناوى الغدر علشان يبيع الأرض ويصرف فلوسها على شهواته"

"والله ما كان قصدى أنى أموته وأخلص عليه دا ابنى وكل أب بيحب أنه يشوف ابنه أحسن منه وفى وضع كويس، لكن هو كان ناوى على الغدر علشان يستولى على الأرض والبيت ويبيع ويشترى ويصرف الفلوس على شهواته بعد ما خدنى بالقوة على الموتوسيكل ومعاه فرد نارى هايخلص عليا بيه، ولما وقع منه أنا أخدته وخلصت عليه، وطلبت الإسعاف علشان يلحقوه قبل ما يموت".

بهذه الكلمات اعترف "أحمد م أ م" 51 عاما، موظف، أمام النقيب أحمد طلعت، رئيس مباحث مركز شرطة سوهاج بالإنابة، عقب العثور على جثة نجله ملقاة بالطريق العام بقرية أدفا دائرة المركز.

ترجع الواقعة عقب تلقى اللواء إبراهيم صابر، مساعد الوزير مدير أمن سوهاج، بلاغا من مركز سوهاج يفيد العثور على جثة شاب فى بداية العقد الثانى من العمر بالطريق الفرعى لقرية "أدفا - سوهاج" بها طلقات نارية بالرأس والصدر.

وعلى الفور انتقل إلى مكان الواقعة العميد حسين حامد مدير إدارة المباحث الجنائية، والعميد محمد توفيق رئيس مباحث المديرية، والمقدم وائل التونى مفتش مباحث المركز، وتبين من التحريات التى قادها الرائد أحمد طلعت رئيس مباحث مركز سوهاج بالإنابة، والنقيبان أحمد تعيلب ومحمد العسال معاونى مباحث المركز، بأن الجثة تخص (محمد أ م أ) 26 عاما، حاصل على دبلوم ثانوى صناعى ويقيم بذات الناحية.

وبمناظرة جثة الشاب تبين إصابتها بطلقين ناريين بالرأس والظهر، حيث تبين أن وراء ارتكاب الواقعة (أحمد م أ م) 51 عاما، موظف، ويقيم بذات الناحية "والد المجنى عليه".

تم ضبط والد المجنى عليه والمتهم بقتله وبمواجهته اعترف بارتكاب الواقعة، وعلل ذلك بسبب سوء سلوك نجله واعتياده على ارتكاب جرائم السرقات مما ألحق به أضرارا نفسية وأدبية.

وذكر الأب: "أنا ابنى كان بيعمل كل شىء غلط فى الدنيا وأحنا من عائلة محترمة وبها مناصب لكن ابنى محترمش كل دا فى البداية كان بيشترى من المحلات وما يدفعش والناس تيجى تطلب الفلوس وأحنا ندفع، وبعد كدا اشتغل فى مرافقة الستات والبنات المشبوهين ووصل فجره أنه جاب واحده منهم البيت وطلعنا بره أنا ومراته وأولاده وأمه وبعد كدا لما حاولنا نمنعه قام بالتعدى علينا بالضرب وكسر دراع أمه وقام بالتعدى على بالسكين فى دراعى بعد كدا غير المكان اللى كان بيجيب فيه الساقطات واستخدم ماكينة الرى خاصتنا فى ممارسة الرزيلة وأولاد عمه مسكوه ونهروه راح مغير المكان تانى ولكن المره الثالثة كانت بطريقة فيها انتهاك لحرمات الموتى كان بيجيب الساقطات ويخدهم فى المقابر دون النظر لحرمتها".

وذكر الأب المتهم: "يوم الحادثة المشئوم جه وهولابس فالنه حملات وشورت وقالى أنا عايز فلوس عايز 10 آلاف جنيه علشان أتجوز، فكان ردى أنا مش معايا، قال الفيزا فيها، رديت عليه أن الفيزا مفهاش غير 4000 جنيه، قال وماله نروح ونجيبهم وبكره تتصل بزملائك وتستلف منهم. وأخدنى بالقوة على الموتوسيكل بلبسه اللى قلت عليه وأنا فى الطريق شعرت أن فيه نية للغدر حاولت أنزل وقاومت وبعدها سقطنا على الأرض وفى لحظه لقيت فرد على الأرض وبجواره شنطه بلاستيك أخدتهم ولقيت الفرد الزناد مرفوع ساعتها عرفت أنه كان ناوى يخلص عليا ضربت أول طلقه متحركش رحت كاسر الفرد وحطيت فيه طلقه من الطلقات اللى بالكيس وضربته بطلقه فى وسطه راح سقط على الأرض" .

واستطرد الأب: "بعد كدا جريت عليه وصرخت على أخوه هات إسعاف بسرعة أخوه خد الموتوسيكل والإسعاف مرضتش تيجى معاه ومات والمباحث قبضت على وأرشدت عن السلاح المُسْتَخْدَم وربنا يسامحنى ويسامحه".

وتحرر عن ذلك المحضر رقم 5254 إدارى المركز لسنة 2014، وأخطرت النيابة العامة وتولت التحقيق وقررت حبس المتهم أربعة أيام على ذمة التحقيق.


موضوعات متعلقة:
تجديد حبس متهم بقتل ابن عمه 15 يوماً بسوهاج