بنت المعز ف حُضّنها
يتجَمّع المرُيدين
صَباحك شُغل من بدرى
وشَايلة يا طاهرة نفحاتك
صوانى تدور على الدراويش
و انا ف حُبك من المجاذيب
شَغلت حروفك المرمر
ف عقد طويل على كتافى
و كان حالى
أشيل من تِبرك الغالى
حجاب قطيفة يحمينى
أنا العاشق
و قلبى القاسى ما بينسى
شرب ...
م نبعك الصافى
صبح طينة
ولا يقدر يشيل منك
ما هو انتى النبض يا نبضى
و حافظه لهفتى ليكى
و ضيق صدرى لو اتنفس
هوا غير اللى من جوفك
بحبك موت
و مش خجلان
ولا وشى
يبان فيه الكسوف ألوان
أنا حبى
من النظرة اللى قبل
الأولى ما تشوفها
أنا اللى الحب خلانى
فردت قلوعى ع السكه
ف حضنك ما لتقيت لى مكان
أنا الناسك و من ناسك
بترفضنى شبابيكك
أبعتر روحى ع السكه
ما بين مكتب و كام شباك
و اسيب قلبى ف ميادينك
و احلف بـ التلات طلاقات
ما أنا راجع
و أستنى
ف ميدان الطاعة تطلبنى
وأكون ناسى وماليش حلفان
وما أعرف مين
ف أيده العِصّمه للتانى
ما أنا المجذوب
لكل ما فيكى من تفاصيل
أنا النداهة تندهنى
أسيب بيتى
أسيب أهلى
"ويجرالى ما يجرالى"
صباحك شغُل يا طاهرة
نسايم صَهدك الدافى
مِحلّى الزحمة ف المترو
و ريحة الفل ف ترابك
مغطّى الجو
والعَادم ميخنقشى
ينقى الصدر ويبخر
بعود نعناع
مِسّاكى النيل
يلاغى نسيم
يبعت لواد على الكورنيش
قصيدة بترسم
اللى ف قلبه ع الورقه
هنا القلعة بتِحَكى تاريخ
هنا سيدنا الحُسين صاحى
ف الوريد
يا روحه الطاهرة
اتسرسبى
و ف القلب اربطى مَرّسى
هنا ...
مقام السيدة
يا آل بيت المصطفى
انا قلبى بايش ... شوق
هنا حضُن بنت المعز
هنا مُلّتقى المرُيدين..
القاهرة
