ظَلم نفسه
وباع الحُب والعِشرة
بسعر زهيد
ونَصّب نفسه
يوم قاضى وأنا راضى
أشوفه مره لو ثانية
بقلب سعيد
مُصرّ تملى
يتغنّى ويتجنّى
على قلبى
اللى يوم حبه
ويعمل فيها بس ملاك
وأنا بطيبتى ومن كبتى
أعديله وأناديله
ومالقاش غير صدىَ صوتى
يرُد عليّا ف سكوتى
تعبت معاك
زرع جوه خيوط قلبه
رموز للعند والاوهام .. ولا بتنام
عيونى من سؤالى عليه
رمى نفسه ف اطماعه
ومقدرشى يفرق بين
حبيب يتمنى ليه فرحه
وبين انسان قوام باعه
ولا عرفشى يقرب ليه
وفكر نفسه أسطورة
وقال الحب مش شورى
وعشنا وسط لوم وعتاب
وعاند بس واستكبر
ويوم عن يوم يزيد اكتر
ونفضل كل يوم أغراب
ربيع الحب شاب ف القلب
من بدرى
ودبلت فيه خطاوينا
ومين غيرنا ف يوم يقدر
يصلـّح غلطته فينا
ويقدر يبنى من تانى
براح يُسكن قلوب الكون
وننسى مين هواه صادق
ونوعد اننا ما نخون
ولكن عِنّد وغروره
يعيشنا ف ضلام وظنون
غرور ماقدرشى ينسانا
وخلىَ قلبنا يابس
وتاه الفرح ويانا
وليل الحزن كان كابس
خلاص ما بقتشى تلزمنى
ولا عايزك تلازمنى
خلاص ارحل مدام شايف
بأنك وحدك العارف
وإنى خنت أيامك
وهَدّيت كل أحلامك
خلاص سبنى أنا الجانى
وسبنى وسط أحزانى
وعيش إنت الحياة عاقل
وسيب قلبى ف هواه مجنون
شخص حزين ـ أرشيفية
لا توجد تعليقات على الخبر
تم أضافة تعليقك سوف يظهر بعد المراجعة