«دليل الناشط الدبدوب»

يدور الزمان وتبقى حقيقة واحدة هى تصلب العقول بين حين وآخر، وتجمد الأفكار بين مرحلة وأخرى، وكأنه «مقدر ومكتوب» ستجد فكرة هذا المقال ليست غريبة أو بعيدة عما يحدث فى كل دائرة انتخابية، وكنت أتوقع أنها حالة طارئة أثناء تحليل بعض الشخصيات التافهة أثناء انتخابات الرئاسة 2014، والحقيقة أننى لم أكن أتوقع أن نفس التجربة سيتكرر فى الانتخابات البرلمانية التى نعيش حالتها، وإن كانت لا تنبئ بخير، إلا أننى مازلت متفائلا إلى حد اللا منتهى. عزيزى الناشط الدبدوب إذا أردت أن تكون «عمرو» برخصة فى 6 خطوات فكل ما عليك أن تسير على هذا المنهج، وأن تتبع هذه الإرشادات التى أكرمنى الله واستخرجتها من ممارساتك اليومية. أولا، دافع عن 30 يونيو وعن تمرد، وقول إنها تصحيح لمسار ثورة 25 يناير، وبعد نجاح 30 يونيو تسب وتلعن يناير بكل ما فيها، ومتنساش تقول إنها كانت نكسة على مصر وكل اللى شارك فيها كان خاين وعميل، وإن شباب تمرد فلول ومخابرات وأخدوا ملايين ومصانع بسكويت، وكل ده عشان تدعم مرشحك الفاشل اللى عمره ما نجح حتى فى انتخابات اتحاد الطلبة، ومتنساش لما يسقط فى انتخابات البرلمان ترجع تشارك مع شباب تمرد فى رؤيتهم لبناء الوطن، ووقتها قول عليهم أبطال شالوا روحهم على إيديهم.

ثانيا: مجد فى السيسى كويس عشان تكسب أصوات مؤيديه ليه ولما تلاقى مرشح تانى أتفه منك بس عرف يشتغلك كويس، ويقول إنه مرشح بتعليمات من السيسى، ابقى اشتم فى السيسى، وقول إنك ضد قانون التظاهر وابقى طالب بالعفو الرئاسى عن المحبوسين. ثالثا: قول ع الجيش المصرى جيش وطنى، وله دور عظيم، ووزع أعلاما فى ذكرى انتصارات أكتوبر، واعمل كام يافطة عليها صورة مرشحك جنب صورة الرئيس السيسى، عشان الناس تقف جنب مرشحك، بس لو الناس وقفت مع مرشح تانى يبقى كل اللى عليك إنك تظهر على حقيقتك، وتقول يسقط حكم العسكر، وإنك ضد جيش المكرونة وجيش كامب ديفيد. رابعا: قول على الشعب «هو القائد والمعلم»، عشان ينتخب مرشحك، بس لو الشعب عايز مرشح تانى قول إنه جاهل وعايز يتعلم، وتقدر تطالب إن التصويت يكون للمثقفين بس أو لأصحاب الشهادات الجامعية، بس خليك واثق إنه لو حصلت معجزة وده حصل برضه مرشحك التافة هيسقط.

خامسا: قف على مسافة واحدة من كل الآراء السياسية، لا تقول يسارى ولا اشتراكى ولا ناصرى ولا لمؤاخذة ليبرالى، وطبعا تبعد عن كلمة علمانى أو إخوانى إرهابى، أو سلفى متطرف ولا تهتف بأى هتاف عشان ما تخسرش تأييد حد، وفى الآخر لما تلاقى نفسك خسرت الكل بسبب ميوعتك السياسية، اشتم كل التيارات، وقول إنك ابن الثورة العظيمة والبس تى شيرت عليه «المجد للشهداء» أو صورة الشهيد الحسينى أبو ضيف، وقول إن الثورة بتاعتك لوحدك. سادسا: قول إنك موافق على قرارات الشعب المصرى فى 30 يونيو، وإنك ابن ثورة التصحيح، ونزل صورتين ليك على الفيس بوك مع الجيش والشرطة، واكتب إنك شاركت فى جمعة التفويض، وارسم على إيدك علم مصر بالألوان، بس لما مرشحك يسقط ويتفضح اعمل نفسك بتاع حقوق إنسان، واستنكر الممارسات اللى بتحصل أو لسه هتحصل يمكن تكسب أصوات النشتاء والحكوكيين ودعاة الديمقراطية. خطوات بسيطة سلسة قد تكون تمارس أغلبها يوميا، ولكن عليك أن تستكمل المسيرة، وبكده تبقى ناشط دبدوب أمور.. ولكى الله يا مصر.