تفاصيل إحالة 4 متهمين لـ"الجنايات" لاتهامهم بقتل "طالب" عقب سرقة هاتفه المحمول بعين شمس.. شقيق القتيل: "قوطة وزمايله قتلوا أخويا عشان يسرقوا تليفونه".. و"كانوا هيقتلونى أنا كمان لما حاولت أدافع عنه"

عادة ما كنا نقرأ عن القتل من أجل الشرف أو الثأر، لكن كثر فى الآونة الأخيرة ارتكاب جريمة القتل العمد لأتفه الأسباب، حتى وإن كانت لسرقة هاتف محمول، كما حدث فى واقعة مقتل "طالب" على يد 4 متهمين بينهم مسجلين خطر، من أجل سرقة هاتفه المحمول بمنطقة عين شمس.

المتهمون

والمتهمون فى القضية المقيدة برقم 15427 لسنة 2015 جنح عين شمس هم كل من، "مصطفى.أ"، الشهير بـ"قوطة"، و"يوسف.أ" والشهير بـ"سمبل"، مسجل خطر، "حسام.س"، "فؤاد.م".

وروى محمد على، المجنى عليه الثانى وشقيق القتيل، فى تحقيقات النيابة العامة التى باشرها المستشار معتز عاطف، تفاصيل الواقعة قائلاً: "اللى حصل ملوش علاقة باللى قالوا المتهم مصطفى إسماعيل الشهير بـ"قوطة" فى التحقيقات، بأن أخويا عبد الرحمن عاكس واحدة قريبته فى الشارع، وده كله عشان يكسب تعاطف النيابة ويكسب تعاطف الناس معاه، لكن الحقيقة إن قوطة هو مسجل خطر معروف عندنا فى شارع محمد فؤاد حافظ، فى منطقة منشية التحرير، وهو بلطجى وتاجر مخدرات مشهور وكل شباب المنطقة بتخاف منه ومباحث قسم شرطة عين شمس عارفين كدا كويس".

مواجهة سابقة بين المتهم والمجنى عليه

وأضاف شقيق القتيل: "عبد الرحمن أخويا حكالى إن قوطة اتعرضله يوم 23 رمضان، وحاول ياخد منه تليفونه المحمول بقوة السلاح لأنه كان معاه مطواة قرن غزال، لكن عبد الرحمن رفض يستسلم له ويديله تليفونه، ودخل معاه فى مواجهة، وربنا نصره عليه، وضربه وقدر يهرب منه وييجى على البيت، وكان ساعتها وشه كله كدمات وجسمه فيه جروح".

وأشار شقيق القتيل: "حذرت بعدها عبد الرحمن أخويا يمشى من المكان اللى بيقعد فيه "قوطة" مرة تانية لأنه مفترى ومش هيسكت، وفعلاً يوم 25 رمضان بعد واقعة محاولة سرقته لقينا "قوطة" جى عندنا البيت ومعاه 3 شباب مسجلين من المنطقة وهما، يوسف إبراهيم هاشم عبد المنعم والشهير بـ"سمبل"، حسام سيد صادق، فؤاد مرعى فؤاد، وفضلوا يندهوا على أخويا وهما تحت البيت ويقولوا "لو أنت راجل أنزلنا"، وفضلوا يشتموا علينا فى البيت".

سرقة موبايل وراء جريمة القتل

وأوضح شقيق القتيل: "ساعتها عبد الرحمن قرر ينزلهم عشان يتكلم معاهم ويشوفهم عاوزين منه إيه، لأن شكلنا بقى وحش جدًا فى المنطقة بعد بهدلتهم لينا، راح عبد الرحمن أخويا قال لـ"قوطة"، إيه يا مصطفى ينفع اللى أنت عامله دا أنا جارك يا أخى إزاى تعمل كدا مع جارك ميصحش؟، راح "قوطة" ماسك فيه على طول، وفضل يضرب فيه هو واللى معاه، ولما أخويا قاومهم "قوطة" ضربه بالمطواة فى "صدره"، وأنا لما شفت منظر الدم وهو نازل من جسم أخويا ومكنتش مصدق راحوا أتلموا عليا وضربونى بـ"المطوة" فى صدرى ورقبتى ودراعى اليمين، لكن أخويا الله يرحمه مات على طول، فالموضوع أصلاً بسبب سرقة موبايل مش معاكسة فتاة زى ما هما بيفتروا على أخويا".

من جانبه، قرر أحمد جاد، مدير نيابة حوادث شرق القاهرة الكلية، وبإشراف المستشار محمد عبد الشافى، المحامى العام الأول، إحالة المتهمين إلى المحاكمة الجنائية العاجلة، على خلفية اتهامهم بقتل طالب عقب سرقة هاتفه المحمول بمنطقة عين شمس.