نص تحقيقات النيابة فى اتهام حمدى الفخرانى بالإبتزاز ومحاولة الحصول على 6 مليون جنيه..النيابة تستبعد شبهة جريمتى الرشوة.. والفخرانى : صموئيل دفع خمسة مليون لصندوق خدمات مقابل قرار تقسيم والمحافظ وافق

حصل اليوم السابع على النص الكامل لتحقيقات النيابة العامة ، فى قضية اتهام البرلمانى السابق حمدى الفخرانى بالحصول على عطية وإبتزار وتهديد صموئيل ثابت زكى للحصول على 6 ملايين جنيه ووحدة سكنية .

واستبعدت النيابة شبهة جريمتى الرشوة والشروع فى النصب من الأوارق ، كما خلت أوارق القضية من نص التسجيلات التى تمت من قبل مباحث الأموال العامة ، حيث جاء نص التحقيقات كالأتى .

بمناسبة تواجد المتهم خارج غرفة التحقيق دعوناه بداخلها وبمنظرته تبين أنه رجل فى نهاية العقد السادس من العمر يرتدى الملابس ، عبارة عن بدلة بترولى اللون وقميص مقلم طويل ، وأحطناه علما بأن النيابة العامة هى التى تباشر إجراء التحقيقات عن التهم المنسوبة إليه وأنكرها ، وبسؤاله عما اذا كان لديه شهود أو محامى يحضر الاجراءات أجاب عن الأول بالنفى والثانى بحضور محاميه ، وأحطناه علما بأن الجرائم المنسوبة إليه وعقوبتها وشرعنا فى استجوابه عن اسمه وجهة عمله ومحل إقامته ؟

ج/ اسمى حمدى الدسوقى محمد الفخرانى 59 سنة واعمل عضو مجلس شعب سابقا ومقيم بالمحلة الكبرى

س/ ما قولك فيما هو منسوب اليك من انك متهم بطلب وقبول رشوة من المجنى عليه صموئيل ثابت زكى لانهاء مشروع تقسيم اراضى خاص به لدى محافظ المنيا والتنازل عن القضايا المقامة ضده حال كونك رئيس مكافحة الفساد ؟؟

ج/ محصلش
س/ ما قولك فيما هو منسوب اليك من انك متهم بزعم استغلال نفوذك لدى محافظ المنيا لانهاء مشروع تقسيم اراضى خاصة بالمجنى عليه حال كونك رئيس مكافحة الفساد ؟؟

ج/ محصلش

س/ ما قولك فيما هو منسوب اليك من انك متهم بالنصب على المجنى عليه بإستخدام طرق أحتيالة بإيهامه بوجود مشروع كاذب فى صورة واقعة صحيحة وهى قدراتك على انهاء مشروع تقسيم اراضى خاصة به لدى محافظ المنيا وذلك بالاستيلاء منه على مبلغ مالى قدره مليون جنيه والمملوكه للمجنى وقد تمكنت بتلك الطريقة من الاستيلاء عليه ؟
ج/ محصلش

س/ ما الذى حدث اذا وما ظروف ضبط وإحضارك

ج/ هو اللى حصل ان انا والاستاذ احمد يحيى المحامى كنا معزومين على الغداء عن الاستاذ علاء حسانين عضو مجلس الشعب السابق عن محافظة المنيا فى منزله فى الشيخ زايد وكان عازمنى عن طريق الاستاذ احمد يحيى المحامى وروحنا منزله فى الشيخ زايد ودخلنا لقيت واحد عنده فى البيت عرفت بعد كده انه صموئيل بتاع المنيا واللى ليه مشكله مع المحافظ هناك وقعدنا حوالى عشر دقائق وخرج علاء حسانين بره الاوضه ورجع تانى ومعاه كيس بلاستيك وقالى فيه مليون جنيه اهه قصده على الكيس اللى معاه وخده ده بس تيجى تزور المحافظ وتقوله لو صموئيل له حق اديهوله وحط المبلغ بالشنطة البلاستيك على تربيزة قدام صموئيل وطلعوا صموئيل وعلاء مبلغ من الكيس البلاستيك حوالى كام باكو من الشنطة كلهم فئة المائتين جنيه وقالولى خد عد الفلوس وانا رفضت فى دخول الشرطة للغرفة اللى احنا موجودين فيها وقبضوا عليا وخدونى على مجمع التحرير وبعدين جابونى على هنا وده كل اللى حصل .

س/ هل يمكنك الوقوف على كيفية تلقيك دعوة الغداء بمنزل علاء حسانين على حد قولك ؟

ج/ النهارده حوالى الساعة الثانية ظهرا انا كنت فى مكتب الاستاذ احمد يحيى المحامى وجه علاء عنده وقعدنا نتكلم شوية وعزمنا على الغداء فى بيته فى الشيخ زايد الساعه السابعه مساء يوم 6 سبتمبر 2015 ومشى عقب ذلك.

س/ أسرد لنا تفصيلات الحديث الذى دار بينك وبين علاء حسانين ؟

ج/ احنا قعدنا نتكلم فى موضوع انتخابات مجلس الشعب وفى موضوع الترشح وعدم الترشح وفتح موضوع صموئيل بتاع المنيا وقال ان صموئيل ليه حق فى الاراضى اللى هو مشتريها من شركة النيل لحليج الاقطان وانه جاله فتوى من مجلس الدوله باحقيته فى تقسيم الاراضى وانا قلت له ان الفتوى استشاريه وانكلم لو عملتم حاجة فى الارض هشتكيكم واشتكى المحافظ وقال كمان ان صموئيل دفع خمسة مليون جنيه تبرع لصندوق خدمات محافظة المنيا علشان ياخد قرار التقسيم من المحافظ والمحافظ وافق له .

س/ هل يمكنك الوقوف على سبب تبادل اطراف الحديث بينك وبين علاء حسانين بشان مشروع تقسيم الارض الخاصة بالمجنى عليه ؟

ج/ هو علاء حسانين اللى فتح الموضوع وقال ان صموئيل صاحبه وان ولاد خالة علاء ليهم ارض فى الاراضى بتاعه المشروع وانا رديت عليه وقلت له ان فيه حكم صادر من الاداريه العليا ببطلان البيع ولا يستطيع شخص مخالفة حكم محكمة.

س/ هل سبق ان تبادلت اطراف الحديث مع المدعو علاء حسانين فى وقت سابق بخصوص مشروع التقسيم والاراضى الخاصة بصموئيل ؟

ج/ ايوه قابلت علاء من عشرين يوم عند نقابة الصحفيين وقال ان المحافظ وافق على مشروع التقسيم بتاع صموئيل وذكر ان صموئيل اتبرع بمبلغ 5 مليون جنيه لصندوق خدمات المحافظة وانا قلت لهم مش هسيب الموضوع ده فقال لى اسكت علشان خاطرى لان فيه ناس قرايبه ليهم ارض فى المشروع ده وان صموئيل مسيحى وليهم اصوات كتير علشان انجح فى الانتخابات.

س/ وهل طلب منك علاء حسانين اليوم او قبل ذلك التدخل لانهاء مشروع تقسيم الارض الخاص بالمجنى عليه لدى المحافظ ؟

ج/ الكلام ده محصلش وهو كل اللى قاله لى فى المرتين اللى تكلمنا فيهم فى الموضوع ده ان صموئيل اتبرع بخمسة مليون جنيه للمحافظة وطلب منى انى اروح للمحافظ واقوله صموئيل ليه حق اديهوله.

س/ وهل دار ثمه احاديث فى مكالمات تليفونيه بينك وبين علاء حسانين بخصوص مشروع تقسيم الاراضى الخاص بالمجنى عليه ؟

ج/ لا محصلش اى مكالمات فى الموضوع ده خالص.

س/ هل يمكنك الوقوف على عدد المرات اللى تقابلت فيها مع صموئيل ؟
ج/ انا مشفتش صموئيل خالص غير النهاردة فى بيت علاء وقت لما الشرطة قبضت عليا.

س / هل يمكنك الوقوف على علاقتك بمشروع التقسيم الاراضى المملوكه للمجنى عليه بناحية قرية دماريس مركز المنيا ؟

ج/ هو اللى حصل انه فى غضون عام 2011 اقمت الدعوى رقم 37542 لسنة 65 ق قضاء ادارى القاهرة بطلب بطلان عقد بيع شركة النيل لحليج الاقطان من الدوله فى كافة محافظات مصر وحصلت على حكم بالبطلان واصبح الحكم نهائى بعد الطعن عليه امام محكمة الادارية العليا واصبح واجب النفاذ بقوة القانون وسبق وان قمت بعمل جنحة مباشرة على رئيس وزراء مصر الاسبق هشام قنديل وعقب ذلك طلبت جميع وزراء مصر والوزراء المختصين بتنفيذ ذلك الحكم دون جدوى ومن حوالى ستة شهور كلمنى محافظ المنيا اللواء صلاح زياده وقالى ان فيه حكم صدر ضده بالحبس ستة شهور لامتناعه عن تنفيذ قرار وقتى من المحكمة بخصوص ارض مباعه من شركة النيل لحليج الاقطان وذهبت له فى المنيا وعرفت ان صموئيل هو اللى رافع الجنحه عليه وطلب منى اتداخل علشان الحكم اللى انا اخدته ببطلان بيع شركة النيل وبعدين بعت المحامى بتاعى تدخل لصالح المحافظ وعرفت بعد كده ان فيه قضية تانى ضد المحافظة وبعت المحامى بتاعى تدخل فيها بناء على طلب محافظ المنيا اللواء صلاح زيادة والمحامى بتاعى تابع القضيتين ومن حوالى عشرين يوم جالى علاء حسانين عند نقابة الصحفييين وحصل اللى انا قلت عليه من قبل ويوم 5 سبتمبر 2015 كلمت اللواء صلاح زياده محافظ المنيا وقلت له هشتكيك لو طلعت قرار التقسيم ورد عليا وقالى هو جاب فتوى من مجلس الدوله بغستحالة تنفيذ الحكم وانا قلت له الفتوى استشارية ولا تقف امام حكم المحكمة ببطلان عقد بيع شركة النيل لحليج الاقطان مطهره من كافة البيوع والديون التى تمت بعد الخصخصة.

س/ وهل سبق لك التردد على محافظ المنيا بخصوص مشروع تقسيم الاراضى الخاصة بصموئيل ؟

ج/ انا رحت اول مرة لما المحافظ كلمنى وقالى انه مرفوع عليه جنحة مباشرة بخصوص الحكم الصادر لصالحى ببطلان بيع شركة النيل وخليت المحامى يتدخل انضامى للمحافظ ويتابع هو مع المحافظ القضايا الثانية ورحت مرة تانيه كان المحافظ عازمنى على الغداء فى بيته.

س/ ما قولك فيما ابلغ به صموئيل زكى وعلاء حسانين بتضررهم منك وجمال مهنى مخائيل مدير الشئون القانونية بمحافظة المنيا و احمد ابراهيم باحث قانونى بالشئون القانونية بمحافظة المنيا وقيامكم بالتواطؤ فيما بينكم مستغلين موقع المشكو فى حقهما الثانى والثالث الوظيفى بالتعنت فى اصدار الموافقة واعتماد محافظ المنيا التقسيم المقدم من الشاكى الاول لقطعة الارض المملوكة له وادعاءكم ان الارض ضمن اراضى الدولة على غير الحقيقة ؟

ج/ الكلام ده محصل وانا اصلا اول مرة اسمع اسماء الموظفين اللى قلت عليهم ومعرفش اى موظف فى محافظة المنيا غير المحافظ فقط وبعدين الارض اللى بيدعى صموئيل ملكيتها مش ملكه دى ملك الدولة.

س/ ما قولك فيما اضافه المجنى عليه من انه وباعادة عرض الموضوع على محافظ المنيا بادر باعادة فحص الموضوع وكان قد تمكن صموئيل من الحصول على موافقة رئاسة مجلس الوزراء باحقيته فى اعتماد التقسيم ؟

ج/ الكلام ده انا معرفش عنه حاجه بس انا عرفت من علاء حسانين ان صموائيل تبرع بمبلغ 5 مليون جنيه وان المحافظ مقابل ذلك وافق على التقسيم واذا كان معاه موافقة مجلس الوزراء هيبقى محتاجنى فى ايه لان الضغط من مجلس الوزراء على المحافظ هينفذه كل حاجة لانه جهة رئاسية له
وسطر ممثل النيابة ملحوظة جاء فيها "واثناء التحقيق تعرض المتهم لإعياء شديد وتم نقله إلى المستشفى للعلاج "

وعقب تماثل المتهم للشفاء فى اليوم التالى تم إستكمل التحقيقات من قبل النيابة العامه والتى جاءت كا الاتى :

س/ هل انت مسئول عن جمعية اهلية بإسم " جميعة مكافحة الفساد " ؟

ج/ الكلام ده مش صحيح ومفيش اى جمعيات باسم جمعية مكافحة الفساد.

س/ هل يمكنك الوقوف على مكان وكيفية وسبب مقابلة المجنى عليه ؟

ج/ انا قابلته امبارح فى بيت علاء حسانين وقت الضبط وقد كنت رايته مرة اخرى ضمن مجموعة من اصدقاء علاء بمنزلى بشارع البحر الاعظم كانوا فى زيارتى منذ اسبوع للتناقش فى امور الترشح لمجلس النواب.

س/ هل لديك أقوال أخرى ؟

ج/ انا عاوز اقول ان صموئيل يعمل محامى ويعلم تماما طبقا للقانون انه لايجوز التنازل عن حكم صادر من المحكمة الادراية العليا لصالح الدولة كما أطلب سماع شهادة كلا من اللواء صلاح زيادة محافظ المنيا والمهندس إبراهيم محلب رئيس الوزراء ووزير الاستثمار وبعض عمال شركة النيل لحليج الاقطان .
والنيابة تقرر حبسه 4 ايام على ذمة التحقيقات ، وتطلب إستدعاء اللواء صلاح زيادة محافظ المنيا للاستماع إلى اقواله .