مفيش واحده بتشبهلِك
حقيقى إنتِ إنسيه
حقيقى زَيّنا عايشه
وساكنه قلبى و عنيّه
ملاك ماشى ف وسطينا
بيملىَ الدُنيا حنّيه
قَمر ليه قلب وبيمشى
سحابة شوق معديّه
بتزرع سحر أشواقى
و لامس روحها بإيديا
أكيد سِت البنات انتِ
ومحظوظة الحياة بيكِ
تغِيب الدُنيا لو غيبتِ
يدوب الحُسن ف إيديكِ
كلام الشعر صار عاجز
يقرب من حدود قلبك
ويوُّصِف نظره لعنيكِ
وأنفاسى بتوّصلِّك
وتاخد إذن من روحِك
تخاف لو حاجه تحصِلك
ف صمتِك حتى أو بوحِك
وما قدرشى أكون مره
سبب ف الحزن و جروحِك
وسيل السِحر ف عيونك
يغَرّق قلبى بالأشواق
وليه ف الدنيا من دونك
غريب قلبه كتير مشتاق
كلام الكون ما يسعفني
على لحظة لُقىَ وفراق
ومسجون جوُّه زِنزانتك
وسِجنك أحلىَ شئ ف الكون
بيخلق فيّـا حريه
وطول الوقت بيه مفتون
بغِيرك قلبى ما حلمشى
ولا قلبِك عليه بيهون
بإيدك جَمّعى فيّا
شَتات قلبى ف صمت الليل
وكونى لحن أُغنيه
يواسينى كتير و قليل
بمشّطِك مَشّطى حُزنى
بروحِك داوى قَلب عليل
صورة أرشيفية
مشاركة
اضف تعليقاً واقرأ تعليقات القراء
مشاركة