محمد عبد الله طاهر يكتب: أنا مش معاق

فكرت كتير اكتب إيه فى يوم زى ده
هدانى فكرى إنى انقلكم إحساسى ده
هأبدأ كلامى فى أوله باعتراض
وكلامى ده هندوله فى كل البلاد
انهارده اليوم العالمى للأقوياء
وأى تسمية غير كده تبقى افتراء
ليه بيقولوا عننا ذوى احتياجات
ده إحنا خطينا بحبنا كل الحاجات
ليه بيقولوا إعاقة وتحديات
ده ظلم وواقع علينا فى التسميات
الإعاقة اللى بصحيح،فى الفكر وفى القلوب
المصنوعة من صفيح الغرقانة فى الذنوب
المعاق هو اللى قلبه مليان بالسواد
اللى ناسى أمر ربه وبيؤذى فى العباد
الإعاقة فى الانحلال اللى استشرى فى البلاد
القلوب المليانة حقد اللى غطاها الرماد
اللى نسيت كل شىء حتى رب العباد
أنا مش معاق،أنا مؤسس الاجتهاد
أنا اللى نقص منه حاجة زاد
أنا اللى عزيمته أقوى من العناد
أنا اللى كرمنى رب العباد
أنا مش معاق، أنا ملك راكب براق
سلاحى الإرادة وهدفى النجاح
وعمرى ما كنت مكسور جناح
أنا مش معاق أنا اللى ربنا كرمنى تكريم
أنا اللى لأمر ربى قلت آمين
أنا مش معاق.. أنا اللى من يوم ما اتولد وله تقدير
أنا الصابر.. أنا القادر.. أنا القدرة على التغيير
أنا الحامد.. أنا الساجد.. أنا الشاكر لرب كبير