جوايا وسط النعكشة
قصص...
وحاجات كتير مفركشة
جوايا صوت وسكوت
وناس كتير مزركشة
تفرح بهلتها ودخلتها
تقرب تلاقى
ألوان رخيصة
بس مدندشة
والكل جوايا مُعرف
وبره حدودى
واوعاك تقرب أو تخرف
خليكوا بس حواليا
لزوم الفرفشة
ووقت اللزوم برضو أبعدوا
لأجل سكون
الكتابة المنمقة المفنكشة
أصل بين الورقة والقلم
قصة حياتى
علاقة بوهيمية
هادية ومخربشة
وارجع وأتوه فى ضلمتى
ووسط النعكشة
أرتب أروق أنضف
كل حاجة مهلكشة
وألقى نور يقاوح
ممرمطة الملطشة
أمسك فيه واحضن حواليه
وافتح ...
ألقى ضلمة منغبشة
والنور راح سداح مداح
ووسط الزحمة
تجى تتمرجح حكاية
بأنوار أفيش فرحة مدهشة
وتروح فى بير البراح
وارجع تانى أدور
بنفس مكرمشة
لحد ما آتكرمش
جوايا حاجات كتير
مرميه وسط النكشه
ويجى الصبح
ألقى نفسى صابحة
لسه متفائلة ومننعنشة
خلود الطيب
لا توجد تعليقات على الخبر
تم أضافة تعليقك سوف يظهر بعد المراجعة