عبدالباسط محمد يكتب: يوم تأخير

بلاش تنظر لغيرك تحت
تتكبر وتتعالى قوى عليهم
بلاش تضحك ف أحزانهم
وتتريق ف بلاويهم
شاركهم روح وفرّحُهم
تلاقى حد يفرحلك
ف يوم فرحك
ويوم حزنك
بدالك يبكوا بعينيهم
مش ح يقل من شأنك
ومن عمرك ح ينقص شىء
ولا يغير معاك حاجة
لناس محتاجة بلة ريق
للمسة أيد لنظرة عين
لأى كلام يطمنهم
يأكد أنهم عايشين
ولسه فيه أمل ليهم
وفينا لسه ناس طيبين
ولسه الدنيا باقية بخير
مجرد بس يوم تأخير
وبكرة جاى بأحلامهم
بيتأسف ويرضيهم
شاركهم روح
شاركهم حتى لو مرة
برسم ضحكة من برة
تهون يومهم القاسي
وطعم عيشتهم المُرة
لذُل الحاجة والعوزة
وحوجتهم مع الأيام
ورعشة جسم مهزوزة
سايقها الهم من قدام
ف سكة دايسه أحلامهم
وكفياهم على وشوشهم
مغيرة كل معانيهم
مبينة أحلى أوحشهم
لكن مش ذنب أو تهمه
تخليهم ولاد ستين
وحاجة عيبة تشبهم
مايتحسبوش كـ بنى آدمين
يطلعوا بره م الحسبة
بلا مفهوم ولا مناسبة
ونستظرف على ظروفهم
ونستهزأ على جروحهم
ونستكتر أمانيهم
نسد الدنيا قدامهم
بدون رحمة نيتمهم
ونقفل كل باب مفتوح
جايب نسمة أمل ليهم
شاركهم روح