المصريون يواجهون الحر بهاشتاج الحرارة اليوم فى "تويتر"

واجه مستخدمو مواقع التواصل الاجتماعى، الشهيرة "فيس بوك" و"تويتر"، الارتفاع الكبير فى درجات الحرارة، والتى سجلت 44 درجة مؤية فى القاهرة، بموجة عاصفة من السخرية، فدشن عدد من مستخدمى موقع التواصل الاجتماعى "تويتر"، هاشتاج "الحرارة اليوم"، احتل صدارة الاستخدام على موقع التدوين القصير.

ووجه المستخدمون تساؤلهم إلى المتشدقين بأنهم يفضلون فصل الصيف على فصل الشتاء، متسائلين: "الناس اللى بيقولوا بنحب الصيف وكده إزى الحال بقى؟"، مضيفين: إحنا آسفين يا شتا.. ولا يوم من أيامك".
وتساءل "محمد عبد الرحمن" قائلًا: "فى حد مصرى طبيعى أو من الوطن العربى بيحب الصيف؟"، مضيفًا: "ياريت الناس اللى بتحب الصيف تقلع كدة عشان هنمدكم على رجلكم".

وغرد محمود جاهين قائلًا: "أتمنى يكون بتوع الصيف وحب الصيف مبسوطين بريحة العرق اللى مالية البلد عايزاكوا تغرقوا فيها".

وكتبت هبة حسن تعريفًا مصريًا لفصل الصيف، فكتبت قائلة: "فصل الصيف عندنا فى البيت اسمه الحيوان اللى شرب من الإزازة دى يقوم يغسلها ويملاها ويحطها فى التلاجة".

وتداول المستخدمون عبر الهاشتاج عبارة ساخرة من ارتفاع درجات الحرارة، مفادها: "البحر أمامكم والنيل وراءكم والدش فى بيتكم.. الطف بينا يارب".

وكتب أحمد محسن: "ومع دخلة الصيف.. تبتدى تقعد تحسب المغرب هيبقى الساعة كام فى رمضان، الحر اليومين دول مينفعش يتقاس بالدرجات المئوية.. مفروض يتقاس بالشعلة زى البوتاجازات كدة.. يعنى الجو النهاردة مثلا أربع شعلات وفرن وشواية".

وعبر أحد المستخدمين عن حنينه لفصل الشتاء، قائلًا: "لما حسيت بالحر اللى أحنا فيه حنيت للشتا مع إنى كنت كارهه"، مضيفًا: "الحر رايح جاى عليا ومش سايبنى، والعرق فاضلو شوية ويوصل لحد رجلى".

وتابعت "جرمين فوزى": "الجو حر تحس أن الشمس طالعة هى وعيالها". وكتب أحد المستخدمين: "الباب اللى يجيلك منه الريح سيبه مفتوح عشان الطراوة".