تامر شاهين يكتب: يوميات صيدلى فى الأرياف.. القافلة

مساء الفل الأبيض المتوسط..
إزيكو
عدى 12 يوم من آخر مرة كتبت فيها الحلقة اللى فاتت، وكتب الكتاب قرب وعهد مبقتش تيجى
طبعا مشغولة بترتيب الحاجات بتاعتها وترتيبات الفرح كمان
حتى أنا مبقتش أقعد فى الصيدلية زى الأول ساعات أغيب كدة تلات أربع ساعات وآجى تانى
سليمان برضو بقا خبرة وعادى بقا ممكن أركن عليه
والله أنا خايف ييجى يوم و يقوللى أنا ماشى علشان أنا ح افتح صيدلية....
تحصل.. ليه لأ؟
المهم وأنا قاعد فى الصيدلية دخل الدكتور حفناوى
- السلام عليكم يا دكتور هاشم
- أهلااااااااااااان دكتور حفناوى إزايك يا دكتور؟ عامل إيه؟
- والله تمام الحمد لله
- نشرب شاى بقا... الشاى ع النار
- أنت عارف أنا مبشربش شاى خليها ينسون
- ههههههههه ماشى تعال نشرب ينسون
دخلنا أنا والدكتور حفناوى جوة على المكتب
- شوف يا دكتور هاشم أنا عاوز أقوللك على حاجة
- إتفضل يا د. حفناوى
- إحنا هنا فى كفر سندوس البهواية بنعمل حاجة اسمها التكافل الاجتماعى.. يعنى عاملين جمعية خيرية كدة مننا فينا علشان مثاعدة أهل القرية ودايما بناخد تبرعات عينية أو مادية من الميسورين أو من أى حد عاوز يتبرع
- تمام يا دكتور حفناوى... ده شىء جميل
- علشان كده أنا جيت أعرض عليك الموضوع ده
- وماله يا دكتور حفناوى، وأنا معاكو.. ده واجب مجتمعى لازم كلنا نقوم بيه
- أوكى.. شوف إحنا بنرتب دلوقتى لقافلة طبية.. ح نعملها فى مقر النادى الرياضى
- تمام
- إحنا ح نجيب دكاترة متطوعين وح يكشفوا على الناث ببلاش
- أوكى
- وعاوزينك لو تقدر تساعد بأى حاجة
- ماشى.. أنا ممكن أساعد بأدوية... أنا عندى هنا أدوية ممكن أطلعها للقافلة دى يوم ما تعملوها
- هايل ده شىء جميل.. يبقا اتفقنا
- وأنا ح أبعتلك الأدوية اللى أقدر أبعتها مع سليمان النهاردة إن شاء الله
- أيوة بس إيه رأيك تحضر معانا القافلة
- هى ح تبقا إمتى؟
- بعد بكرة
- اهاااا.. بس أنا ح يبقا عندى عذر
- ليه؟
- أصل أنا كتب كتابى بعد بكرة
- والله العظيم؟.. ألف ألف مبروك يا دكتور هاشم، وربنا يتمم بخير إن شاء الله
- ربنا يبارك فيك يا دكتور حفناوى
- طيب خلاص زى ما اتفقنا بقا.. وح اثتنا منك الحاجة تبعتهالى مع سليمان
- طب والينسون؟
- لا ما خلاص بقا. وبعدين الينسون لما بشربه هنا بيقلب بحاجات وحشة ههههه، نشرب الشربات يوم الفرح إن شاء الله
- ههههه ماشى يا دكتور حفناوى مع السلامة
هايل جدا.. أنا كدة كـ هاشم اتبسطت
طبعا الواجب المجتمعى ده برضو مهم للناس
للّى بيعمله و للّى بيستنفع منه
مش مهم أبدا إنك تكسب وتكبر فلوسك و خلاص
مهم كمان إنك تساعد المحتاج
- سليمان
- أيوة يا دكتور هاشم
- بقوللك.. ح أعمل لك لسته كدة بأدوية من هنا من الصيدلية ح تجيبهم و تحطهم فى كرتونة وهاتهملى أراجعهم
- ماشى يا دكتور
المهم عملت له اللستة فعلا وإديتهاله وطلع الأدوية المكتوبة
بس إيه.. تشوفو سليمان دلوقتى ما تعرفوهوش
تحسوا إنه لاعب سيرك بيتحرك على الأرفف والأدراج و بيجيب الأدوية من غير ولا غلطة
الله يرحم يا سليمان.. فاكرين؟
راجعت الأدوية اللى فى الكرتونة كلها وكله تمام
زى ما فيه حاجات مش كويسة لقيتها واتكعبلت فيها فى كفر سندوس البهواية برضو فيه حاجات كويسة وكان لازم أحكى عنها
كل مكان فيه الحلو والوحش برضو، وفيه الكويس وفيه الشمال
المهم تعدى إنت من كل دة وما تلبسشى فى أى حاجة شمال
- جوود إيفيننج دكتور هاشم
- خالووووووووو إزيك؟ حمد لله ع السلامة
دة خالى يا جماعة لسه جاى من أمريكا طازة
كل اللى أعرفه إنه قال إنه ح ييجى يحضر الفرح وياخد رست فى مصر شوية
لكن مكنتش أتوقع أبدا إنه يجيلى هنا فى الصيدلية
- إنت إزاى جيت هنا؟
- أنا جيت مع والدك ووالدتك، هما فى العربية برة.. ياللا ياللا كلوز يور فارماسى آند كم وز مى
- اها طب ثوانى يا خالو... سليمان.. أنا ح اطلع مشوار.. كمل إنت ولو حصل حاجة كلمنى وآخر اليوم وصّل الكرتونة للدكتور حفناوى فى بيته.. ماشى؟
- ماشى يا دكتور
بعد إذنكو يا جماعة.. خالى بقا ما شفتوش بقالى سنين
ياللا أشوفكو بقا فى الحلقة الجاية
دمتم بخير
سلامو عليكو