لواء طيار متقاعد محمد كشك يكتب: هو فين البحر يا جماعة؟

فى أوربا والدول المتأدمة – على رأى الراجل بتاع الإرهاب والكباب – أما عربيتين بيخبطوا فى بعض بينزل الاتنين السواقين ويتصلوا بالبوليس اللى بيجى فى التو والحال، وبيبص ويعاين وفى الآخر بيحرر تقرير بالواقعة وبيقول سين – مثلا - هو اللى غلطان، وساعتها صاد يروح على شركة التأمين اللى تبعها سين ويخليهم يصلحوله العربية ويتصرفوا هم بعد كده مع سين، اللى غالبا ما بيرفعوا عليه القسط السنوى للتأمين – باعتباره راجل مصدر خطوره فى سواقته.

النهارده قمت مخضوض من النوم، قال إيه، عربيه خبطت العربيات اللى نايمة فى الشارع فى حضن الرصيف.. نزلت بسرعة خايف إن احتمال يكون نابنى من الحب جانب، لقيت شاب مستهتر ماشى بعربيته فى الطريق بالعرض خبط تاكسى، اللى بدوره خبط عربيتين واقفين فى أمان الله..

أما نزلت كانوا هم جابوا البوليس وواقفين يتفاوضوا مع بعض، ودى بعض المقتطفات من على ترابيزه المفاوضات:
- البوليس: حاولوا يا جماعة تحلوها ودى، بدل المحاضر والعطلة، ولعلمكم لو عملنا محضر العربيات دى كلها هنحجزها فى القسم لغاية إما يطلع أمر النيابة.
- صاحب التاكسى: أنا مش غلطان، هو اللى خبطنى وحدفنى ع العربيات اللى واقفة

- صاحب العربية الغلطان: أنا عندى استعداد اتحمل التكاليف بس محدش يقوللى أصلح فى التوكيل
- صاحب العربية المضرورة: الباب اتفعص يا جماعة، أنا عاوز باب جديد، وبعدين أنا أعمل أنا إيه لو ظهر بعد كده مشاكل فى العفشة.

- واحد من الجيران باين على شكله أنه ضابط شرطة: العربية المنطقة الحرة دى ما تدخلهاش فى الموضوع، دى لا يقودها إلا مالكها وليها دفتر تربتيك وموال، وبعدين هى خبطتها مش كبيره يعنى
الموال ده قعد حوالى ساعة، وأنا أما زهقت، سبتهم يتفاوضوا وطلعت، بس دماغى برضه ما سابنيش، وقعد يهلفط بشوية كلام فارغ : قال إيه أمال التأمين الإجبارى اللى إحنا بندفعه ده فايدته إيه، مش ده اسمه تأمين لصالح الغير برضه، طيب إذا كان هو قانونا إنه يجبر ضرر الغير فى الأحوال اللى زى دى، طيب ليه الناس مش بتلجأله، طيب إذا كانت الناس مش عارفة أو فاهمة الموضوع بالشكل الصحيح بتاعه، طب ليه الحكومة مش بتوعى الناس وتعرفهم، طيب إذا كان هو مش معمول للحاجات دى، أمال هو معمول لأيه، وليه الحكومه بتاخده أصلا.

فى الآخر دماغى وصل لنتيجه نهائية، إن الفزورة دى ما لهاش غير حل واحد: أن التأمينات بتاخد مننا الفلوس دى فردة، وبعدين الحكومة بتاخدها من التأمينات فردة برضه، واللى مش عاجبه يشرب م البحر..
ألا هو فين البحر يا جماعة؟