وأنا قلبى كان عايش كطير
بيلف كون أخضر جميل
رغم النهاية المُحزنة
رغم الرحيل
رغم الوجع خطوة عذاب
مشوارها يمكن ألف ميل
روحى الغريقة ف موج هموم
ماسكة ف حبال المُحتمل
رغم الأمل.. شىء مستحيل
م انا أصلى باقى ع الوعود
مربوط ف عهدى للهوى
وبرغم قلبى اللى اتكوى
مخلص قوى رغم العذاب
لسّانى بفتح للشروق
ميت ألف باب
يا حبيبتى إيه معنى الغياب
غير قلب قاعد ع الرصيف
كما شيخ عجوز ضهرُه انحنى
ليه النهاية المُحزنة؟
وانا كُنتلك شلال فرح
لو يسعدك إنّى انجرح
أنا مستعد أموت قتيل
لكن بلاش يبقى الرحيل
هوّ اختيارك للعقاب
معنى الغياب
إنى أعيش عمرى ف نارين
نار الفُراق والانكسار
والتانية نار قلبى الحزين
ومافيش يا روح الروح عقاب
على ذنب واحد مرتين
وان كانلى ذنب وما اعرفوش
ف الحُب تطهير للذنوب
وانا قلبى داب ف الحُب دوب
وحياة هواكى اللى انكتب
على قلبى نار
وحياة غرامى اللى ما يوم
لمسُه الغُبار
أنا ف الغرام مخلص قوى
وطريقى ف الحُب الوفا
ليه تحرمينى من الدفا
وتطوحينى بطول دراعك
ف الجليد
أنا قلبى عمره ما كان حديد
مع إنه كان قبل الغرام
مخلوق عنيد
من يوم ما شافك وابتدا
يفرح قوى بشكله الجديد
وما عادش يجرى ف الوريد
غيرك وبس
قلبى اللى فيكى ارتاح قوى
قلبى اللى بيكى ف لحظة حس
محتاج تمدّى الإيد بشمس
وتطبطبى على قلب مات
من يوم ما قررتى تسيبيه
محتاج حبيبتى تحضنيه
وتعيدى نبضه للحياة
إنسان حزين - أرشيفية
لا توجد تعليقات على الخبر
تم أضافة تعليقك سوف يظهر بعد المراجعة