بالفيديو والصور.. المطلقات والأرامل فى بورسعيد يتظاهرن بملابس حمراء رمز "الإعدام" لحرمانهن من شقق "الإسكان الاجتماعى".. رشا: "مفيش مسئول بيحس بينا وعايزين سكن يحمينا من التشرد".. ونصرة: "أسكن فى عشة"

حالة من المعاناة تعيشها المطلقات والأرامل وكبار السن فى محافظة بورسعيد، بعد قرارات لجنة التسكين بحرمانهن من حقهن فى الحصول على وحدة سكنية ترحمهن من عذاب وغلاء المفروش الذى ينوء بكاهلهن نظرا لدخلهن المحدود، ما اضطر عدد منهن لتنظيم وقفة احتجاجية بالملابس الحمراء للتعبير عن أن القرار بمثابة "الإعدام" لهن أمام مبنى المحافظة احتجاجا على هذه القرارات.

هتافات المطلقات

وهتفن هتافات للاستغاثة بالرئيس عبد الفتاح السيسى منها: "يا رئيسنا يا رئيس.. بورسعيد بتستغيث"، و"المحافظ بيقول لأ ملناش عنده أى حق لأ ولأ ومليون لأ عايزين حقنا بالحلال سيسى يا سيسى الحقنا يا ريس".

وقال عدد من المطلقات لـ"اليوم السابع"، إنهن تقدمن للمشروع الاجتماعى بالمحافظة ليرحمهن من عذاب المفروش وغلاء إيجاره الشهرى الذى ينوء بهن ولكنهن فوجئن بعد عامين باستبعادهن بحجة أنه لم يمض على طلاقهن أكثر من عامين وهذا الشرط لم يكن موجودا باستمارة المشروع التى وضعتها وزارة الإسكان.

وناشدت المطلقات الرئيس السيسى لمنحهن وحده سكنية لحماية أولادهن من التشرد لتحقيق العدالة الاجتماعية التى كفلها لهن الدستور.

حكايات المطلقات

وبحزن شديد تقول وفاء مكرم، ربة منزل، 30 سنة، مطلقة تعول طفلة تناهز السادسة من عمرها: نعيش بمسكن إيجار شهرى قدره 800 جنيه ويتزايد كل 3 شهور حتى وصل لـ1200 غير الكهرباء والمياه والمعيشة الصعبة بغلائها وأتقاضى نفقة 300 جنيه بالإضافة لمساعدة من مديرية التضامن الاجتماعى بجانب عملى فى بعض المحلات التى تركتها لرعاية ابنتى التى تحتاج للعناية والرعاية وللأسف الأمل اللى كنت بنتظره السكرتير المساعد والباحثين معدومى الضمير أطاحوا به نطالب بحقنا أسوة بالغرباء.


وتقول سمر عبد المجيد 28 سنة: إحنا 490 مطلقة كل واحدة فينا ليها مأساة بختها مال ولا لقيت راجل يحافظ عليها ويتقى الله فيها يعنى المطلقات معذبين وكفاية نظرة المجتمع، أنا واحدة انكسرت على تربية أولادى الثلاثة وكمان المحافظ بيكمل علينا بقرارات ظالمة حسبنا الله ونعم الوكيل.

وتستكمل رشا فؤاد 27 سنة: أعمل فى أحد مصانع الاستثمار بمبلغ زهيد وأسكن من الباطن مع أسرتى وكل يوم بيعدى عليه أنا وطفلتين يعانون من حساسية الصدر والحياة ومتطلباتها صعبة وقدمت فى المشروع الاجتماعى علشان نترحم من العذاب والهموم اللى كل يوم بتزيد ومفيش مسئول بيحس بينا نناشد السيسى يمنحنا مسكن يأوى أولادنا ويحمينا من التشرد بسبب قرارات إدارة التسكين الجائرة.


نصرة على، 33 سنة، ربة منزل، تقول: أسكن فى عشه وشايله هموم الدنيا ورزقى محدود وبشتغل فى المنازل علشان أوفر فلوس المسكن المفروش وعايشه على أمل ومستحمله البهدله علشان أربى ولادى المحرومين من حنان الأب وكمان المحافظ كمل علينا وحفظنا علشان مطلقة أثناء تقدمى للمشروع ولم يمر على طلاقى عامين يعنى أيه نموت ويحكم علينا بالإعدام حرام عليه.


وتقول شيماء والحزن يعتصر قلبها: المحافظ لم يفكر لحظة واحده أن يحتوينا أو يقابلنا ويسمع شكوانا علشان وقته ضيق ولا يسمح للغلابه، إحنا مش عايزين نقابله إحنا عا يزين الرئيس السيسى يجيب حقنا وحق ولادنا وينصفنا ويرحمنا من العذاب.

موضوعات متعلقة:

-بالفيديو والصور.. المطلقات يتظاهرن بملابس الإعدام لحرمانهن من "المأوى" فى بورسعيد