لو حسّه عايزة تغضبى
مش ح امنعك
ولا ح ارضى أبدا أجبرك
تمشى ف طريق
مش راضيه بيه
وان كسر قلبى ح يسعدك
قومى اكسريه
وحياة غلاوة حُبّنا
ما ح اقول عملتى ف قلبى إيه
ولا حتى ليه
ماهو ملك إيدك من زمان
ف أن كنتى عايزة تجرحيه
روحى اجرحيه
وانتى اللى بعد ما تجرحيه
ح تطببيه
ف أن كنتى عايزه تغضبى
مش ح امنعك
ولا ح أوصفك يوم بالجحود
ح افضل بكل الشوق أجود
دا مافيش فراشه مهما كان
تقدر تعيش من غير ورود
وانا قلبى مفتوح الحدود
ممدود عشان تتمشّى فيه
يعنى أن حاولتى تكسريه
ح تلاقى نفسك ف المطر
جيتى قوام تتدفّى بيه
طب عايزه تانى أقولك ايه ؟
سهل الكلام لكن أكيد
الحب مش حبّة كلام
يحفظ حروفه المغرمين
لو حتى عاشوا ألف عام
يتكلموا.. دول كدّابين
الحب وحياتك إمام
وإحنا وراه..
بنقول أمين
ف أن كنتى عايزه تغضبى
مش ح امنعك
ولا ح اسألك إيه غضّبك
أنا بس ح افتح قلبى شوق
يا تخُشّب فيه
يا تدبحيه
ورّينى لحظه ما تشوفيه
ح تقولى إيه
صورة أرشيفية
لا توجد تعليقات على الخبر
تم أضافة تعليقك سوف يظهر بعد المراجعة