صلاح السنديونى يكتب: أمانة فى يدك

ياللى مرشح نفسك عايز.......تبقى فى مجلس شعبنا
ممكن طبعا تصبح فايز....لو حتراعى ربنا
اوعاك مرة فى جلسة تنام....والا نشوفك كل عام
بعد ما عشنا معاك احلام....مثلت انك بتحبنا
انت بتحب الاصوات......اللى تاخدها فى الانتخابات
بعديها التعلب جه وفات..... وغنى فاتت جنبنا
ليه ما بتعملش استجواب.....كل يومين وتدق الباب
ع الحكومة والا اصحاب... بقتوا هدفكوا غلبنا ؟
وقت مناقشة القوانين.........خليك صاحى كده وأمين
شوف مصلحة الشعب فين....وبكده تاخد حقنا
بقيب يعنى بتمثلنا........احنا وكل أولاد جيلنا
واوعى نشوفك بتبصلنا........ بصة تقطع قلبنا
صوت الناس دى امانة فى يدك... صونها واحفظ دايما عهدك
حاسأل سؤال وعايز ردك........ بتحب فعلا شعبنا؟
ياللى مرشح نفسك عايز....تبقى فى مجلس شعبنا