الحلول العبقرية لا تأتى إلا من حكومات عبقرية، معروفة، آخر الحلول المفتكسة جت من راجل كبارة بيشتغل وزير التعليم العالى، عاوز إيه سيادته؟!.. قالك أنا بطالب بإلغاء كليات الحقوق والتجارة، بتقولوا إيه يا ولاد؟!.. قالك هنلغى حقوق وتجارة، ونص الشعب يروح فين يا دكتور؟!.. قالك ما هو %66 من خريجى الكليات دى عاطلين، يبقى نقفلها؟ ولا نشغلهم؟.. نقفلها ولا نطور الدراسة فيها بحيث تواكب سوق العمل؟!.. اللهم إنا لا نسألك رد القضاء، ولكن نسألك الصبر على الاختراعات الحكومية.
ألف مبروك يا مصريين.. هتستريحوا
بشرى سارة للشعب المصرى الصبور، من اتحاد الصناعات، قالك: «سنرفع أسعار الأدوية %50»، يا نهار أسود، %50 مرة واحدة؟! رد اتحاد الصناعات: «تدريجيًا»، الله؟! طب وهترفعوها ليه؟!.. رد اتحاد الصناعات: «هدفنا راحة المواطن»، ربنا يكرمك يا باشا، ويعمر بيتك، بس عشان خاطر ربنا كفاية راحة، ما تريحهاش أكتر من كده.
تم أضافة تعليقك سوف يظهر بعد المراجعة