مسمط حبايب الفراعنة
المصرى معروف بجبروته آه، بس مش للدرجة دى، والفشة والكرشة جميلة آه، بس مش لدرجة إننا نقطعها على حجر أثرى، عمره 2300 سنة، من عهد بطليموس حاكم مصر بعد الإسكندر الأكبر، كتير كده، الحجر المسكين بقاله 15 سنة بيتقطع عليه لحمة راس وكوارع يا مؤمن فى المحلة، والصدفة البحتة خلت موظفة آثار تشوفه وهى بتشترى لحمة لبيتها، وتتعرف عليه، عاوز تضحك أكتر؟ بعد ما المسؤولين عرفوا إنه حجر أثرى عملوا إيه؟ بعتوا له «لودر»، أيوه لودر، رفعه من ع الأرض ونقله، وهى دى مصر.
رجعت الشتوية
كل سنة وحضرتك طيب، الشتا لسه بادئ، الأربع 21 ديسمبر، الله ؟! طب كل البرد اللى كان قبل كده مين اللى هيحاسب عليه؟ بسيطة، مجتش ع البرد يعنى، ربنا يرحم كل اللى مرميين فى الشوارع وتحت الكبارى فى البرد ده، المهم انت دفى نفسك كويس، مصر كلها عيانة وعندها برد، ودفى ولادك، ربنا يجعلها أيام جميلة، وتعدى على مصر والمصريين بسلام وأمان.
تم أضافة تعليقك سوف يظهر بعد المراجعة