صراع الشباب والفتيات على هاشتاج "إزاى تطفشى العريس"

أطلق رواد موقع التدوينات القصيرة "تويتر" هاشتاج " إزاى تطفشى العريس"، تصدر قائمة الأكثر تداولا متجاوزا 40 ألف تغريدة، تحكى عن أفضل الأساليب والطرق الحديثة والمبتكرة ورسائل الشر من الفتيات لتطفيش العرسان، وردود الشباب على تلك الرسائل.

أفكار عديدة مميزة وتقليدية ابتكرتها الفتيات للهروب من الجواز، تنوعت الآراء بين هذا وذاك، حيث قالت مروة البحيرى: "طلعيله القهوة من غير سكر، طلعيله المياه فيها ملح، اطلعيه بأشيك بيجامة عندك، الميك قلم فلوماستر للحواجب، روج أحمر بس"، وقالت سمر فؤاد: "ارفعله حاجب واحد بس، أول ما يشوفنى هيحس انى مش طيقاه ويطفش هو وأمه وأبوه".

 

 

أما "ابتسام نادى" فحكت ما قام بفعله عندما تقدم لها أحد الشباب طالبا يدها للزواج، قائلة: "مرة ولد جه هو وباباه يخطبنى، بابا قالى اعملى شاى، عملت شاى من غير سكر ليهم ولبابا بسكر، أول ما داقوا الشاى ركنوه ومشيوا"، أما "حنان الشناوى" روت هى الأخرى قصة تطفيشها للشاب المتقدم لها، قائلة: "دخلت بعباية سودا وشبشب حمام ونص شعرى برا الطرحة ومفيش حاجة على وشى، وبردو مصمم انه يخطبنى، فى الأخر أنا قولتلهم قصير".

 

 

هاجر اقترحت اقتراح مادى يطفش العريس من أول مرة، قائلة: "سهلة.. قوليلة عايزه أيفون 7"، فيما اقترحت آية عبد الرحمن، قائلة: "كُلى توم وبصل قبل الموعد واطبخى كرنب وعدس فى نفس اليوم، اقعدى احكى عن أحلامك فى قصر الأمير"، وقالت نور الطويل: "لو جاب معاه جاتوه أو شوكولاتة تقوليله العلبة دى فيها اية يابا، ولو مش جايب تقوليله انت داخلى فاضى وجايب أمك كمان".

 

على الجانب الآخر من الفتيات كانت هناك أراء رافضة لفكرة تطفيش العريس، منها "نورهان شوقى" الذى قالت: "هى فى عرسان اليومين دول وأنا معرفش، جواز إيه يابيه، إحنا بنتشعلق فى رضا ربنا"، وقالت شيرى: "هو لو مش مناسب ليكى  يكفى انك ترفضى، مش محتاجة انك تخططى تطفشيه ازاى"، وقالت ريمو: "الموضوع أبسط من كدا بكتير، أنا مش موافقة وخلاص".

 

أما الشباب المشاركين فى الهاشتاج، فكانت ردودهم تعكس هجوما على فكرة التطفيش، حيث قال محمود ناصر: " متتعبيش نفسك هو هيطفش لوحده😊، ده طبعا لأنك تستاهلى واحد أحسن منه يقدر يواكب سعر الدولار بالنسبة للجنية"، وقال محمد يسرى: "حضرتك هما لاقين عرسان عشان يطفشوهم، دول ما بيصدقوا واحد يجيب شبكة".

أما محمد إبراهيم فقال: "استهبال أوى بقى، هو حد لاقى عرسان أصلا فى الأسعار دى، الجواز بقى بيتكلف الضعفين تقريبا احمدى ربنا"، وقال محمود شقير: "هما حلين بس، أولا شيلى طبقة المكياچ واتكلمى زى مبتكلمى صحابك، لو عجبك الوضع يبقى عليكى وعلى الحل التانى، انك تطلبى الشبكة دهب".