* ميدو سيحل ضيفا بالقناة..وأموت وأعرف ماسك على مرتضى إيه؟!
* مرتضى منصور يتنفس كذباً..وأبو لمعه الأصلى
شن الإعلامى عمرو أديب، هجومًا شرسًا على مرتضى منصور، عضو مجلس النواب، متوعدا إياه بالرد القاسى دون رحمة، مؤكّدًاً أنه لن يقبل بالتصالح أو الاعتذار، وذلك بعد تدشين الأخير حملة تحت قبة البرلمان لإغلاق برنامج "القاهرة اليوم" الذى يقدمه أديب.
وقال عمرو أديب، فى برنامجه "القاهرة اليوم" المذاع عبر فضائية "اليوم": "قررت الدخول فى هذا الموضوع للنهاية.. لن نعيش تحت إرهاب أو ابتزاز ولن نسمح أن يسىء أحد للسمع وخدش حياء الآخرين، والبرنامج بيقول للأعور أنت أعور فى عينك" مستطردًا: "قررت المواجهة وليس لدى ما أخشاه أو أخشى عليه.. مرتضى واخد المجلس زيارة ومقاولة لحسابه، وأقنعهم بالكذب ومفيش توقيعات وناس توقيعاتها مزورة والبعض أنكر ذلك".
وأضاف: "أنا واقف.. اللى عاوز يبقى معايا أهلا وسهلا.. اللى مش عايز أنا واقف قدامك للنهاية.. مرتضى عاوز يوقف البرنامج قبل الاثنين القادم علشان حلقة ميدو".
عمرو أديب: مرتضى هدد بتكسير استوديو القاهرة اليوم
وتابع: "مرتضى كلم الإدارة وهدد بإرسال ناس لتكسير الاستوديو.. ياريت يا أخى، تعالى راجل لراجل وورينى نفسك.. إحنا رجالة طول عمرنا وتربينا رجالة وعمرنا ما خفنا.. كان غيرك أشطر.. أنت كنت تحت السرير وكنت عارف مين اللى كان بيحميك.. فاكر ولا لأ.. المجتمع كله عارف بس بينافقه.. أنا باخد حقى بدراعى.. مابخفش ومكمل للآخر، يا أنا يا أنت فى مصر.. عمرو عمره ما خاف ولا تراجع وحلقة ميدو هتتذاع، إلا إذا عملت حاجة فى ميدو".
أديب يتوعد مرتضى منصور
وتابع أديب موجّهًا حديثه لمرتضى منصور: "مادام محدش بيلمك أنا اللى هلمك، وأنا واقف قدامك ومش هسكت.. ولو تعرف أنا معايا إيه والله مش هتقعد فى مصر.. وعاوز يبقى رئيس لجنة حقوق الإنسان.. متهم بقتل المتظاهرين فى 25 يناير، وهناك شبهة بإن إيده فيها دم فى حادث الدفاع الجوى".
وقال أديب ببرنامجه: "مرتضى قلب على عكشة فى البرلمان.. بيقلب على أى حد حتى ابنه.. بيبيع أى حد.. إنما أنا مابتبعش ولحمى مر، ومكمل للآخر ويارب أدخل السجن.. أنا مش خدام ولا مدفوع لى فلوس ولا متجوز بنتك.. أكمّل؟!.. يا أنا يا أنت ومستعد أقابلك فى أى مكان راجل لراجل، واللى عنده بلاغات ضد مرتضى يقدمها.. محدش يخاف.. لو أنت شغال عند مين أنا ومصر أهم، وحرية المصريين أهم، ولن نسمح بالتطاول مرة أخرى، وأنا قاعدلك على الواحدة ومش هسيبلك غلطة".
عمرو أديب لـ"مرتضى": "بقولك حمرا"
وحذر أديب، مرتضى قائلاً: "أنا مش بتضرب على قفايا وأجى أعتذر، وعمرى ما عملتها ولا عمرى هعملها.. كان غيرك أكبر.. الله أكبر.. خلاص بقى فاض الكيل وإما اعتدلت أو اعتزلت، مرتضى يتنفس كذباً دون أن يقدم شيئا للوطن.. أنا مش هسكت ولا يهمنى ولا تفرق معايا ومش هعتذر ولن أتصالح لو آخر يوم فى حياتى.. يا أنا يا أنت.. مين يقول للعورة أنتى عورة، ومين يقول للغولة أنت عينك حمرا.. أنا هقولك حمرا.. هى مش عزبة ولا عنينا مكسورة.. إحنا أشراف وطول عمرنا أشراف".
أديب لمرتضى: مراتك كانت بتكلمنى عشان يدخلولك الأكل فى السجن
وتابع: "أنا راضى عن نفسى جداً، ولو تم إغلاق البرنامج هعمل قناة على اليوتيوب، يوم ما اتسجنت يا مرتضى، ابنك جاء إلى القناة ليناشد حسنى مبارك إنه يخرجك.. ومراتك وبنتك كانوا بيكلمونى كل يوم على الفطار فى رمضان عشان يدخلولك الأكل فى سجنك.. مراتك جات هنا على القناة اللى بتتهمها إنها سعودية.. دلوقتى بقت سعودية؟!.. القاهرة اليوم أكبر منك.. ولا يهمنى ما تقول، أنت بتألف وأبو لمعة الأصلى، ويا خسارة ماكنش نفسى أعمل فيك كده ولا أنزل لهذا المستوى، ولكن إذا كان لهذا البلد أن ينظف فلابد أن يكون هناك من يقف ويقول لا.. كده كفاية ولم نفسك ومش ورايا حاجة.. وهرد عليك بالأسامى واحدة واحدة".
عمرو أديب: مرتضى ليس مستشاراً
وواصل أديب هجومه قائلاً: "أنت مش مستشار، وتوفيق عكاشة مش دكتور، أموت وأعرف ميدو عارف عنك إيه.. فيه إيه!.. أنا أول حد طلع مرتضى فى الإعلام وكان بيعمل فقرة عندى.. وبقولكم ماحدش يخاف واللى عاوز يعمل هشتاج ضد مرتضى يعمل، واللى يقدم بلاغ يقدم.. أنا بكسر حاجز الخوف، وعاوز الناس تدخل ورايا.. الخوف انتهى.. معقولة ده ينفع رئيس لجنة حقوق الإنسان فى البرلمان! وحلقة ميدو هتتعمل، ولو جاى تكسر أنت ورجالتك هقفلك أنا ورجالتى وهاخد حقى بدراعى.. وده دراعى ومستعد فى أى مكان وهفضل عمرو أديب وأنت هتفضل مرتضى منصور".
موضوعات متعلقة..
حقيقة توقيعات النواب ضد عمرو أديب.. ورقة مرتضى منصور لوقف برنامج "القاهرة اليوم" تضم أسماء مكررة.. وخالد يوسف: لم أوقع.. يوسف القعيد: فوجئت بوجود اسمى دون علمى.. غادة عجمى: الإمضاء المتداول لا يخصنى
عمرو أديب لـمرتضى منصور:"لن نعيش تحت إرهاب وابتزاز ويا أنا يا أنت فى مصر"
عمرو أديب يهاجم مرتضى منصور:"أنا لحمى مر.. ومدام محدش بيلمك أنا هلمك"
