صناع السياحة يتحدثون فى ندوة "اليوم السابع".. الزيات: 2.5 مليون عامل هجروا السياحة..والأزمة تستمر سنة أو اثنتين.. والتأمينات أخذت أحكاما بحبس المستثمرين..كامل أبوعلى لـ"هشام زعزوع": سيب مكانك لحد تانى

يواجه القطاع السياحى فى مصر، أزمة قد تكون الأسوأ خلال السنوات الماضية، فى ظل انحسار الحركة السياحية الوافدة لمصر،عقب حادث الطائرة الروسية المنكوبة بسيناء فى أكتوبر الماضى، وتعليق عدد من الدول الأوروبية رحلاتها لمصر، تعاقد الحكومة مع شركة بريطانية لمراجعة الإجراءات الأمنية بالمطارات، لم يكن مرضيا للمستثمرين ووصفوا بإهدار الوقت والمال، وأن الدولة لا تشعر بالمستثمرين وتتعامل معهم على انهم بتوع " هشك بشك " رفضوا إنشاء شركة للطيران الخاص وطالبوا بالسعى لخلق طلب على مصر وكشفوا عن مشاكلهم وكيف تتعامل الدولة مع مستثمرى القطاع السياحى

هل البنك المركزى وافق على جدولة مديونيات القطاع السياحى ومنح قروض ميسرة للمستثمرين ؟

هشام على رئيس جمعية مستثمرى جنوب سيناء :
البنك المركزى وافق لأول مرة على الاقتراض بالدولار للقطاع السياحى على ان يتم صرفها للمستثمر بالجنيه المصرى لسد احتياجات الفنادق من مستلزمات التطوير، ويقوم المستثمر بسداد تلك القروض كاملة بالدولار، وبالتالى المستثمر سوف يستفيد من الفائدة الصغيرة للقرض الدولارى والتى لا تتجاوز عن 3 أو 4 % وتستفيد البنوك بالسداد بالدولار، على أن يتم سداد قروض الإحلال والتجديد على 10 سنوات .

وماذا عن تأجيل مديونيات القطاع السياحى لدى الجهات الحكومية الآخرى ؟

حسام الشاعر عضو مجلس إدارة الاتحاد المصرى للغرف السياحية:
وزارة الكهرباء قامت بتطبيق قرار تأجيل مديونيات القطاع لديها، ولكن التأمينات الاجتماعية لم تلتزم بالقرار.

هل هناك تعنت من قبل وزيرة التضامن الاجتماعى فى عدم تنفيذ تأجيل المديونيات؟

الهامى الزيات رئيس الاتحاد المصرى للغرف السياحية :
تم توقيع بروتوكول مع وزيرة التضامن الاجتماعى فى أغسطس الماضى، ينص عل تأجيل التأمينات ويتم السداد شهر من الجديد وشهر آخر من المديونيات المتأخرة ..وقولت للوزيرة لن يطبق البروتوكول على الأقصر وأسوان علشان معندهوش حاجة يدفعهوا .. لما كنا عند رئيس الوزراء قال لها معندكيش حاجة تدهلهم فقالت ممكن يدفعوا 5% .. وقلت لهم بالنص "لو مردتوش عليا خلال ساعة أنا هنشر هذا الكلام .. انتم ايه اللى مأخركم ..رد عليا مستشار الوزيرة قال "معنديش تعليمات من الوزيرة ..طيب أنا اروح لمين إذا كنا خدنا القرار كلنا واحنا قاعدين ومكتوب عند رئيس الوزراء .. احنا عندنا مشاكل كتير.. المستثمرين صدر ضدهم أحكام بالحبس .. وبعدين التأمينات أخذت حكم على "النيل هيلتون" ومش عارفين انه قفل .. انا استويت معاهم".

ما تعليقك على انعقاد مؤتمر " التخطيط من أجل النمو ..السياحة المصرية فى 2016" بحضور ممثلى صناع القرار بالخارج؟

المستثمر السياحى كامل أبو على

"دى فرقعة" عملها الوزير للإبقاء فى مكانه ..أنا عاوز أعرف المؤتمر كلف كام ؟ .. وكان من الأولى ينعقد المؤتمر فى شرم الشيخ أو الغردقة .."ده ألف باء تسويق " ومعظم اللى شاركوا فى المؤتمر مصريين، أيه العائد من انعقاد المؤتمر .. مصر هتشارك فى معرض ITB فى برلين، وهتكون فرصة لمقابلة صناع القرار السياحى بالعالم ..دا اسمه اهدار للمال العام ..المصيبة اللى حصلت فى عهد وزير السياحة أنه وافق على نقل المكتب السياحى من " فرانكفورت " العاصمة الاقتصادية لألمانيا ..لمدينة "برلين " علشان يخدم مصالح مين؟ .. أى دولة فى العالم بتعمل مكتبها فى "فرانكفورت" ..لكن احنا علشان مصالح شخصية.

كيف يمكن معالجة أزمة السياحة الإيطالية بعد مقتل الشاب الإيطالى بالقاهرة؟

لما وزير السياحة مرحش معرض ايطاليا طيب مين هيروح؟ .. أنا عاوز وزير السياحة يواجه فى الوقت الصعب مش الوقت السهل .. لو مفيش تغيير جذرى وبشكل سريع ويكون هناك ناس بتحب مصر وبتخاف عليها .. احسن حاجة نقفل فنادقنا ..بس يقولوا من دلوقتى علشان الخسائر متزدش اكتر ونحافظ على صحتنا، احنا بقالنا 5 سينين استهلكنا فيها .

ما تعليقك على الحملة الترويجية التى تم إطلاقها فى السوق الألمانى؟

الحملة الإعلانية اللى عملها الوزير هى إهدار مال عام وحاجة تكسف ومعمولة بعشوائية.

هل توافق على إنشاء شركة طيران خاص؟

حسام الشاعر عضو مجلس إدارة الاتحاد المصرى للغرف السياحية:
لا ..أوافق على إنشاء شركة طيران .. أنا وكيل شركة كبيرة فى ألمانيا وأوروبا كلها ..تم إلغاء 60% من حجوزات الصيف وتم تحويل الطائرات لمقاصد آخرى علشان مفيش طلب ..المشكلة عندنا انك تخلق " طلب" وليس شركة طيران .. أعمل شركة طيران لما الاقى أن كل الطائرات الوافدة لمصر كاملة العدد ومحتاج لزيادة الطاقة الناقلة .. حالياً الطائرات موجودة لكن مفيش طلب على مصر.

هل نحن نسئ استخدام بعض الاحداث للترويج لمصر فى الخارج على سبيل المثال زيارة الرئيس الصينى؟
الدكتور خالد المناوى رئيس غرفة شركات السياحة:

انت عندك أسواق كثيرة مهملة مثل السوق الصينى فيه ألفين سائح كل اسبوع فى مصر .. ألفان سائح يعنى انت بتتكلم فى 100 ألف سائح ودى حصة بسيطة جداً مكنتش موجودة قبل كدا.. لما وجدت وسيلة الطيران المناسبة بقى فيه سوق .. وأنا لو مكان "مصر للطيران" لازم ابص ده اشتغل وانا طائرتى مشتغلتش .. لان مصر للطيران فيها كام ألف عامل محملين على 60 طائرة فتكلفة التشغيل عالى جداً فبيكون سعره أعلى من الطيران الخاص

ما هو رايك فى إنشاء شركة طيران خاص ؟

ليه اعمل شركة طيران وانا عندى 8 شركات تعمل فى مصر .. بس تعالى شوف انا اديتهم تشغيلات ايه .. وكيف يدار التشغيل .. انا كان لازم ادى ليه تشغيلات مقابل إلزامه انك تشتغل شارتر لاوروبا ..يعنى لازم يكون 25% من شغلك شارتر او لاينر من اوروبا .

تعليقك على إنشاء شركة مصرية لإدارة المطارات بخبرة أجنبية ؟

ايه المشكلة فى شركة الأمن المشكلة فى العامل البشرى ..احنا محتاجين "شركة تفتيش"..أمن المطار فى يد الجهات السيادية ..لكن هل التفتيش يحتاج لجهات سيادية؟ الإجابة لا.. القصة ببساطة ووفق المطارات العالمية أن الفرد بيشتغل ساعة وبياخد نص ساعة راحة وهو خارج يشرب سيجارة ولا ياكل ساندوتش ويرح رجليه وعنيه ولما بيرج هو مش بيكون عارف هو رايح على "جايت" كام بيخش على الكمبيوتر ويكتب أسمه والكمبيوتر هو اللى بيحدد موقع عمله علشان ميعرفش يعمل ديل او يتفق مع الناس لو حد داخل بحاجة.. وبعدين الراجل اللى هجيبوا مينفعش يبقا رجل داخلية.. التفتيش فى المطار لا يمكن له أن يخضع لاحد ولابد ان يكون هناك ثواب وعقاب ويكون اقدر افصله ولا لا.. والا هرجع لمشكلة مصر للطيران انى عندى 40 او 35 ألف موظف وعندى 60 طيارة.. طيب انا هقسم عدد الموظفين فى مصر للطيران على عدد الطائرات واقول هل هذا هو المعدل العالمى..الطائرة بيخدمها 30 عامل، لكن فى مصر للطيران بيخدمها أكثر من 100 عامل .

ما رايك فى الحملة الترويجية لمصر بالخارج ؟

فيما قبل عام 2010،كان هناك استراتيجية قائمة على زيادة عدد السائحين والإنفاق على صناعة السياحة.. وأن كل دولار بيصرف بيأتى امامه 183 دولار وكل 100 ألف سائح بيعملوا مليون فرصة عمل .. علشان كدا وصلنا لـ15 مليون سائح و12 ونص مليار دولار .

لازم مصر تعمل حملتان إحداهم تروج للسياحة وأخرى تقوم بتغيير الصورة الذهنية السلبية عن مصر .. تخصيص 45 مليون دولار للحملة رقم ضعيف جدا .. تركيا بتعدى 200 مليون دولار واحنا مش اقل من تركيا ولا اليونان.. الوزيرة اليونانية كانت موجودة معانا وقالت ارقام تخض وقالت ان اللى يقوم اليونان من كبوتها بعد المساعدات هى السياحة.

الاهتمام بـ "السوشيال ميديا" مش بتكلف حاجة .. هاتوا 2000 شاب واعملوا ليهم قاعة وأجهزة كمبيوترات قاعدين بيرصدوا العالم كله .. ويتابع كل كلمة اتكتبت على مصر ويرد عليها ويعملك تقرير .

بعض العاملين فى قطاع السياحة تركوا هذا القطاع لان السياحة حرام.. هل انا غيرت الفكر بتاع الناس أن السياحة حرام.. واحنا اتحولنا من شعب جالب للسياحة لطارد لها اخلاقيتنا تغيرت فى التعامل مع السائح والتحرش.. هل انا عملت حاجة لمكافحة التحرش .. هل علمنا الأطفال فى المدارس أن السياحة شئ مهم.

وماذا عن التعاقد مع شركة " كنترول ريسكس " البريطانية ؟

"كنترول ريسكس" أنا فى رأى أننا " اشترينا الزراير قبل ما نشترى البدلة" .. الاول كان لازم اتصور أنا محتاج ايه المطارات والناس محتاجة ايه منى فى مطاراتى.. الناس اول حاجة عوزاها التفتيش ولكن لابد أن يتوفر لدى البنية الأساسية أولاً اللى تيجى تشتغل عليها "كنترول ريسكس".. انا عارف ايه المشكلة عندى وهى العامل البشرى وإجراءات التفتيش فى المطارات وحاجات كتيرة جداً .. انا كان لازم الاول اشخص المرض ومن ثم ابدأ فى العلاج مش اروح .. هل نحن نحتاج إلى وزارة سياحة .. نعم نحن فى حاجة على الدور الرقابى للوزارة لاننا مش كلنا ملائكة.. هل الوزارة بحاجة إلى إعادة هيكلة .. هيئة تنشيط السياحة عليها دور كبير جداً تحت إشراف السياحة.. انا مينفعش اعلاج مشكلة السياحة فى مصر بكيكة فى حب مصر مهرجان الطبخ ..لابد أن تطعم أجهزة الدولة بشباب ذو فكر جديد دى وجهة نظرى انك تغير المقاعد.

موضوعات متعلقة:

بالفيديو..بطل السومو:لم أتخيل دعم الرئيس بهذه الطريقة وأسعى لتنشيط السياحة