على هامش اليوم العالمى للمرأة .. طابخة لنا إيه النهاردة؟

فى الثامن من مارس يحتفل العالم بيوم المرأة تخليدا لنضالها، وخروجها فى مظاهرات للمطالبة بحقوقها فى تحسين ظروف العمل والمطالبة بحقوقها السياسية، والمساواة بالرجل.

ده حال العالم فى 8 مارس، لكن حالنا إحنا فى مصر ممكن يتلخص كتير منه فى جملة هند صبرى –يسرية- لزوجها الفنان الراحل خالد صالح فى فيلم أحلى الأوقات:"أنا عايزة ورد يا إبراهيم، وماتقوليش إن كيلو الكباب رومانسى أكتر من الورد".

المشهد اللى عبر باختصار عن رفضها الإهمال ، ورتابة الحياة بينهم بعد مرور سنوات على الزواج، وعدم تقديره لكل ما تقدمه هى لحياتهم معا، وإن فيه حاجات تانية فى الحياة غير دوامة الأوامر، والنواهى، والأسئلة، والانطباعات اللى بتدور فيها الست المصرية بشكل عام سواء فى البيت ، أو الشغل ، أو الشارع .. خدى العيال للحضانة ؟ .. هاتى العيال من الحضانة ؟ .. ذاكرى للبنت ؟ .. راجعى للولد ؟ .. البنت تعبانة وديها للدكتور .. طابخة لنا إيه النهاردة ؟ .. تعبانة من إيه ؟ .. هو أنتى بتعملى حاجة؟ .. مش قد الشغل ماتشتغليش؟ .. إحنا خدنا من شغلك إيه؟ .. اقعدى فى البيت.
ليه عايزة تنزلى تشتغلى ؟ .. إنت ناقصك حاجة؟ .. أنا راجع تعبان فى أكل أيه؟ .. أجيب لكم فلوس منين؟ .. هو أنا بطبع الفلوس؟ .. رايحة عند أمك ليه؟ .. إنت مابتروحيش تزورى أمى ليه ؟ .. هو أنت ماتبطليش كلام فى التليفون؟ .. أصحابك دول هما اللى هيخربوا لنا البيت .. لا مش موافق ماتروحيش .. ماتلبسيش .. هاسمى الواد على اسم أبويا .. هاسمى البنت على اسم أمى .. أنا راجع من الشغل تعبان.

فى الشغل الأسئلة، والانطباعات متنوعة تناسب الجميع المتزوجة وغير المتزوجة.....
إيه اللى لابساه ده؟ .. لبسها قصير .. لا لبسها طويل .. بتلبس ضيق .. بتلبس واسع .. هى لسه ماتجوزتش؟ .. مصاحبة فلان .. لأ سابته .. لا هو اللى سابها .. هى لسة ماتجوزتش؟.. إترقت على أيه؟ .. إمكانيات .. لا قدرات .. لا لا مهارات .. ماتستاهلش ترقية .. هى قلعت الحجاب؟ .. كانت أحلى بالحجاب .. بقت أحلى من غير حجاب .. هى لسه برضو ماتجوزتش؟ .. بتزاحمونا فى رزقنا ليه؟ .. ما تقعدوا فى بيوتكم بقى .. إتجوزت؟ .. لسه ماخلفتش ليه؟ .. خلفت ولد، هاتجيب البنت أمتى؟ خلفت بنت، هاتجيب الولد أمتى؟ .. هى تخنت كده ليه؟ .. هى خست كده ليه؟ .. مش عاجبك يا أنسة/مدام إنزلى خدى تاكسى.

أما الجيران والأقارب حتى الدرجة ألف وخمسمائة وعشرين .....
هى لسه ماتجوزتش؟ .. هى بترجع متأخر ليه؟ .. هى بتشتغل أيه؟ .. وياترى بتقبض كام؟ .. هى اشترت عربية؟ .. بكام؟ .. كاش ولا تقسيط؟ .. هى بتقبض كام؟ .. ماتجوزتش؟ .. عندها كام سنة؟ .. حلوة بس قصيرة .. مش حلوة بس دمها خفيف.. لسه ماتجوزتش؟ .. سمرا شوية؟ .. بياضها فاقع؟ .. اتخطبت قبل كده؟ .. وأيه اللى حصل؟ .. بنت خالتها اللى أضغر منها معاها عيلين وهى لسه ماتجوزتش.
والأهل ...
رايحة فين؟ .. هترجعى أمتى؟ .. ماتتأخريش؟ .. ماتروحيش؟ .. ماتنزليش .. ماتكلميش .. ماتضحكيش .. ماتلبسيش .. ماتعيشيش .. مش هتتجوزى بقى؟؟؟
بجد الله يعينك....