ﺃﻭﻝ ﺷﺮﻭﻁ ﺍﻟﻘﺼﻴﺪﺓ أﻧﻚ ﻣﺎ ﺗﻜﺘﺒﻬﺎﺵ
ﻭﺗﺮﺑى ﺣﺰﻧﻚ ﻭﺃﻭﻫﺎﻣﻚ ﻋﻠﻰ الغالى
ﻭﺗﻘﺘﻨﻊ إﻥ ﻧﺰﻓﻚ ﺃﺻﻠﻪ ﻗﻄﻦ ﻭﺷﺎﺵ
ﻟﻜﻦ ﺧﻄﺎﻭى ﺍلأﺳﺎمى ﺟﺎﺕ ﻋﻠﻰ ﺍﻟﺨﺎﻟى
تانى ﺷﺮﻭﻁ ﺍﻟﻘﺼﻴﺪﺓ: اﻧﻈﺮﺍﻟﺼﻔﺤﺔ
ﺗﺎﻟﺖ ﺷﺮﻭﻃﻬﺎ ﺍﺗﻀﺎﺣﻬﺎ ﻭﻫى ﻣﺶ ﻭﺍﺿﺤﺔ
ﻭﻓﺨﺮﻫﺎ ﻭﺳﻂ ﻧﺎﺳﻬﺎ ﺑﻤﺸﻴﻬﺎ ﺍﻟﺒﻄﺎﻝ
ﺧﺎﻣﺲ ﺷﺮﻭﻃﻬﺎ ﺑﻴﺒﻘﻰ ﺑﻌﺪ ﺗﺎﺳﻌﻬﺎ
ﺳﺎﺩﺱ ﺷﺮﻭﻃﻬﺎ ﺍﻟﻌﺪﺍﺀ ﺍﻟﺤﺮ ﻟﻸﺑﻄﺎﻝ
ﻭﺍﻟﺜﻮﺭﺓ ﻋﻠﻰ ﻛﻞ ﻣﻦ ﻟﻪ ﺿﻬﺮ ﻭﻟّﺎ ﺷﺮﻭﻁ
ﻗﻬﻮﺓ ﺑﻀﻤﻴﺮ ﺳﺎﺩﺓ ﺗﻌﻤﻞ ﻓﻨﺠﺎﻧﻴﻦ ﻣﻈﺒﻮﻁ
ﺁﺧﺮ ﺷﺮﻭﻁ ﺍﻟﻘﺼﻴﺪﺓ ﻣﻮﺿﻌﻪ فى ﺍﻟﻨُّﺺ
ﺇﺷﻔﺎﻗﻬﺎ ﻉ ﺍﻟﺒﺤﺮ ﻓى ﻋﺰﻭﻣﺔ ﺍﻟﻤﺮﺍﻛﺒﻴﺔ
ﻏﻀﺐ ﺍلأﻧﻮﺛﺔ ﻭﺑﻜﺎﻫﺎ ﻟﻤﺎ ﺑﻨﻘﻮﻝ"ﻧَﺺ"
ﻭﺑﻘﻌﺔ ﺍﻟﺴﻤﻨﺔ ﻟﻤﺎ ﺑﻨﺒﻘﻰ ﺟﻠَﺎﺑﻴﺔ
ﺗﺎﻟﺖ ﺷﺮﻭﻁ ﺍﻟﻘﺼﻴﺪﺓ: لأ ﺩﺍ ﻣﺘﻜﺮﺭ
ﺗﺎﻣﻦ ﺷﺮﻭﻁ ﺍﻟﻘﺼﻴﺪﺓ: ﺣِﺐ ﻭﺍﺗﺤﺮﺭ
ﻭﺍﺛﺒﺖ ﻋﻠﻰ ﺍﻟﺒﺮﺩ ﻣﻬﻤﺎ ﺍﻟﺸﻤﺲ ﻫﺘﺒﺮﺭ
ﻗﺮﺭ ﺗﺪﻣﺮ ﻭﻗﺮّﺭ ﺑﻜﺮﺍ ﻓﻲ ﺍﻟﺘﺤﻘﻴﻖ
ﺇﺷﺮﺏ ﻭﺟﻌﻬﺎ ﺍﻟﻤﻤﺮﺭ ﻛﻞ ﻳﻮﻡ ﻉ ﺍﻟﺮﻳﻖ
ﻭﺍﻫﺪﻱ ﺍﻟﻤﺪﻳﻨﺔ ﺍﻟﺤﺰﻳﻨﺔ ﺧﻠﻖ ﻏﻴﺮ ﺍﻟﻨﺎﺱ
ﻭﺍﺧﻠﻖ ﺟﺤﻴﻢ ﺍﻟﻤﻮﺩﺓ ﻭﺍﺯﻋﺞ ﺍﻟﺠﻨﺔ
ﺗﺎﺳﻊ ﺷﺮﻭﻁ ﺍﻟﻘﺼﻴﺪﺓ: ﺇﻭﻋﻰ ﺗﺘﺄﻧﻰ
ﺳﺎﺭﻉ ﺇﻟﻰ ﺍﻟﻤﻌﺼﻴﺔ.. ﻋﺎﺩى ﺍﻟﻠى ﺑﻴﻄﻴﻌﻮﺍ
ﻗﻮﻡ ﺍﺷﺘﺮى ﺍﻟﻔﻞ ﻟﻤﺎ ﺍﻟﻜﻞ ﻫﻴﺒﻴﻌﻮﺍ
ﺧﻠﻴﻚ ﻣﻼﺯﻡ ﻋﻠﻰ ﺍﻟﺘﻮﻫﺔ ﺑﻼ ﺩﺑﺎﺑﻴﺮ
ﺯﻳّﻦ ﻛﺘﺎﻓﻚ ﺑﺪﻣﻚ ﻭﺑﺪﻣﻮﻉ ﺍﻟﺒﻴﺮ
ﻭﺻﻬﺪ ﺟﻮﻓﻪ ﺑﺮﻏﻢ ﺍﻟﻤﻴﺎ ﻭﺍﻟﺰﺣﻤﺔ
ﻋﺎﺷﺮ ﺷﺮﻭﻁ ﺍﻟﻘﺼﻴﺪﺓ ﺧﻮﻓﻬﺎ ﻡ ﺍﻟﻠﺤﻤﺔ
ﻭﻧﻘﺸﻬﺎ ﺍﻟﻨﻮﻧﻮ ﻓﻲ ﻗﻠﻮﺏ ﺍﻟﻨﺒﺎﺗﻴﻴﻦ
ﺍﻟﻠﻲ لا ﺑﻴﻄﻮﻑ ﻋﻠﻴﻬﻢ ﺃﻫﻞ ﻭلا ﻭﻟﺪﺍﻥ
ﻣﺨﻠﺪﻭﻥ ﻓﻲ ﺍﻟﻤﺤﺒﺔ ﺍﻟﻠى ﻣﺎ ﺑﺘﺸﺒﻌﺶ
ﻟﻜﻦ ﺗﻔﺾ ﺍﺷﺘﺒﺎﻙ ﺇﺑﻠﻴﺲ ﻣﻊ ﺁﺩﻡ
ﺃﻭﻝ ﺷﺮﻭﻁ ﺍﻟﻘﺼﻴﺪﺓ: الرقص بالديناميت
وحبها للحياة لو كات بشكل مميت
والإحتفال بالهدوء لو فجّر العالم
موضوعات متعلقة..
- ديوان شعر وأغنية جديدة للرائد سمير صفوت بعنوان "تحيا مصر"
- "وحدتك" قصيدة جديدة لوائل فتحى فى حلقة جديدة من "عيشها شعر"
تم أضافة تعليقك سوف يظهر بعد المراجعة