سيد منير عطية يكتب: أشياء مشابهة

كل شىء ممكن يكونلك
ف الحياه أشياء مشابهة
حتى ف الأحداث بالاقى
برضه فيه أحداث مشابهة
زى حرب ف قلب جبهة
كل شىء يشبه لكلُّه
صوت قنابل
صوت بارود
صوت رصاص
واللى راحوا للخلاص
دمّهم على كل جبهة
إلا إنتى
شىء مالوش أبدا شبيه
والغريبه إن حبّك
م الجحيم واخد طباعه
واللي أغرب من دا كله
قلبي سابنى وراح عليه
رغم قلبى ملاك بطبعه
يبقى نارك تاخده ليه؟!
شىء طبيعى يكون سؤالى
جوّه نارك حس إيه؟
المؤكد حاجة أجمل
من حياته وم الكلام
المؤكد جوّه نارك
جنّه وعليها السلام
وان قلبى ف حضن قلبك
انطلق بجناح حمام
واللا يمكن حاجة تانية
حاجه أكبر
حاجه خلّت قلبى يسكر
وامّا غاب عن وعيُه راحلك
كل حاجة ف إيده سابها
ساب حياته اللى ف زينتها
ساب راحتها
ساب تعبها
لما شافك شيء مالوش
ف الحياه أشياء مشابهة
بس خوفى يفوق ويلقى
نفسه شجرة ربيعها عدّى
والخريف لحظة ما هدّى
مد إيده قوام وجابها