إدلب ..
اضرب ياد اضرب
والحل الثورى
والحل الأنسب
والحل الأممى
والحل الدموى
والحل الأصعب
راح أقولك رأيى
ولو عايز تغضب
إغضب
رسم بيانك
زى ميدانك .. متقلب
يوم مغلوب
ويوم تغلب
وأهى ساقية وبتدور
م الحسكة لدير الزور
وجسر الشغــور
والحسابة تعد وتحسب
وموعودة يا اللى عليكى الدور
يموت الشعب
ويعيش المنصب
ينصرنا الرب
ضامنين الجنة وبنات الحور
وعايزنى أغشك
وأجاملك وأشهد لك زور؟
لا معرفش أنافق
ولا أناور
ولا أكدب
ولا أندد حتى وأشجب
ولا أغش
ولا ينفعش تلعب بالنار
مبيتعلمش
من أخطائه غير إلــــــ . . . .
وأنا لما أختار
أختار الحل الأصعب
سرقاك الفــرحة
وواخداك
وأهو لما تصحى
تلاقينى هناك
بين الجد وبين المزحــة
منتشى م الفرحة
مستنى لقاك
وافتح لك صفحة
دانة فى ملعب
سطر فى صفحة
وأطلسى دم لنشر الفوضى
من مصراته لصنعا
وأرحب
والكل مرحب
والبقرة بتنزف دم
وتحلب
وبملء الفم
الكل بيشرب
ولا حد بيشبع
ولا حد بيتعب
أبويا وأخويا والخال
وأولاد العم
الفم مخضب
خشمنا مفتوح ما بيشبعش
ما فطرش
ولا اتغداش
والوجبة الأشهى .. ببلاش
والهدف الأسمى
والحل الأنسب
دوره ما جاش
بوفيه مفتوح ببلاش
ناكل مكة ونشرب يثرب
وما بنشبعش
والداخل إدلب ما بيرجعش
والناس راضيين حامدين للعرش
وبنهتف للى بيغلب
دقينا أوتادنا
أدمنا المقلب
مسامير فى النعش
خرمنا المركب
غرقناها
وإحنا معاها وجواها
وكلنا مهرة فى فن العوم
نعرف نهرب
ولما المركب تغرق
نرمى اللوم
على مستشرق أو مستغرب
وليه نتعجب .. وكلنا جينا
وحضرنا وسدينا
من مسقط للمغرب
وشاركنا وشجعنا
وبنتعصب
لوقفة صبحى وعماد متعب
عدنانى وقحطانى
وعربى ومستعرب
هزائمنا بالجملة
وإعلامنا ومولانا
بيقودوا الحملة
وبيقولوا هنكسب
يعنى حكايتنا
وزيتنا
ونارنا فى بيتنا
وحنورثها لذريتنا
وبإيدينا نشعللها
لأجل ما نغلب
لكن نطفيها ؟
لاااااااا
ليه نطفيها ؟
بكرة هنكسب
وقفة - صورة أرشيفية
