الجامعات على الأبواب، فلا يفصلنا عنها سوى أسابيع قليلة، وتستعد الفتايات لخوض التجربة الجامعية حاملات معهن آمال وأمنيات، وحتى لا تقعى فريسة للسخرية أو تكونى مادة خام لـ" حوارات الشباب" تعرفى معنا على أبرز 10 حاجات هتسمعيهم فى أول يوم بالجامعة .
هو المدرج منين ؟
اول كلمة هتسمعيها فى الجامعة هتكون هو المدرج منين رغم إنكم ممكن تكونوا قدامه، ولكن شيخ الشباب لازم يجر كلام عشان يبدأ بشلة كبيرة من أول يوم.
الساعة كام؟
سؤال خالد منذ الـخمسينات، فتلاقى الشاب "الروش" داخل بكل براءة ويقولك هو الساعة كام؟، ونسى أن عصر الساعة انتهى ودلوقتى فى موبايلات .
أنت معانا هنا فى الكلية؟
إذا سألك هذا السؤال دا فتأكدى من إنه جاى "يروش"، لإنه مش منطقى إنك تروحى الكلية أول يوم عشان تغيرى جو.
كنتى جايبة كام فى ثانوى؟
بعد إنت معانا فى الكلية، أول سؤال هيوجهه ليكى كنتى جايبة كام فى ثانوى؟ لتجيبى بتلقائية، وتفتح إجابتك أمامه محورين ليكمل تعارف إما أن يكون مجموع كبير، فيمدحك ويتغنى بفشله ويذكر كيف شغلته شلته ومغامراته عن المذاكرة، وإما أن تكونى من أصحاب المجموع المتواضع فيتباهى بنفسه أمامك لينال إعجابك من أول يوم.
بيقولو الدكتور فلان رخم؟
لو لقيتيه قال على دكتور معين صعب فى التعامل مع الطلاب، من أول يوم فتأكدى إن دى طريقة جديدة للكلام معكى لأنه يريد أن يظهر مدى خبرته الطويلة فى الجامعة، لتلجئى بعد ذلك إليه فى كل كبيرة وصغيرة إن صح صدقه، وإن لم يصح سيقول لكى " سبحان الله اتغير أوى الدكتور عن الدفعات اللى قبل كده ومتحكميش غير فى آخر التيرم" .
حاسس إنى شوفتك قبل كده!
أول ما يقول الجملة دى إعرفى إنه عايز يتقرب لكى، ويفتح مواضيع.
إنتى شبه حد أعرفه!
لو قالك إنتى شبه حد أعرفه امشى وسيبيه عشان فى الآخر هتطلع حبيبته اللى سابته واللى لسة بيموت فيها وعايز بديل ليها حتى لو مش شبها.
متعرفيش هنجيب الكتب منين؟
سؤال تقليدى يسأله الشباب فى الجامعة للبنات، فقد يسأله أحدهم بتلقائية، ولكن البعض لا يدع فرصة للحديث مع الجنس الآخر إلا وتمسك بها.
لكى أصحاب فى الكلية؟
الشباب فى أول يوم جامعة متعطشين دائما لتكوين صداقات فما بالك، لو " شلة بنات"، هيسأل عن أصحابك لتعرفيه عليهم، وإن لم يكن لديكى أصدقاء سيقول ها أنا ذا.
تحبى أوصلك؟
قد يعرض عليكى أحد الزملاء توصيلك، سواء للمدرج أو المواصلات ليظهر أمامك بمظهر الـ"جان" فى أول لقاء يجمعى به وليترك فرصة للحديث مرة أخرى.
