شدد مرتضى منصور رئيس الزمالك، على عدم قدرة ناديه على تجديد عقد النيجيرى معروف يوسف لاعب الفريق الأبيض مقابل 350 ألف دولار.
تابع رئيس الزمالك خلال المؤتمر الصحفى، الذى عقد بمقر النادى اليوم، "لو معروف يوسف هيمضى بالمصرى أهلا وسهلا لكن بالدولار لا".
كما حذر مرتضى اللاعبين قائلا، "أى لاعب غير ملتزم مالوش مكان عندى.. رمزى خالد بره الزمالك رسمى هيروح نادى المقاولون العرب يمكن لما يشيل هناك أسمنت وجبس يعرف قيمة الزمالك وإسلام جمال غالبا هيروح يغنى فى بتروجت".
علق مرتضى على هروب مايوكا، "مصر كلها فرحانة أنه هرب.. كان لاعب ملتزم وعمل خطة عشان يمشى.. ليه مبلغ صغير لكن مستحقاته موقوفة زى باقى اللاعبين بعد التعادل مع أسوان، وقدمنا شكوى لاتحاد الكرة وشكوى للاتحاد الدولى".
وفيما يخص طلب الزمالك إنهاء إعارة خالد قمر، أكد مرتضى، "مع احترامى للاتحاد السكندرى فى أجهزة رقابية عليه والاتحاد مدفعش قيمة الصفقات اللى الزمالك إداهالهم ولما جالى مشالى قالى خد الفلوس من الشركة الراعية لكن الشركة قالت مالهمش فلوس.. فاستأذنا نرجع قمر قالوا الجماهير هتعمل مشكلة قولتلهم طب هاتوا كاسونجو إعارة قالوا برضه الجماهير هتزعل، ما أنا كمان عندى جماهير هتزعل وفى شرط جزائى بغرامة تأخير 500 ألف جنيه على كل لاعب متتدفعش فلوسه وأنا بستأذنهم الموضوع يخلص ودى".
وعن الطفرة الإنشائية بالزمالك، أوضح مرتضى أن الزمالك صمم مبنى اجتماع لا يوجد مثيل له فى أمريكا.
