زمان كان الدولار هو العملة الصعبة، لكن فى الأيام الصعبة أى عملة بقت صعبة، حتى الشلن النمساوى، ولا الين اليابانى، الجنيه بقى أسهل حاجة قدامهم، ما بيصعبش غير علينا، واللى يصعب عليك يفقرك.
المشكلة، إن العملة الأصعب جدا دلوقتى، وبقت أصعب من الدولار واليورو، هى الطاقة الإيجابية، شحت من السوق، واختفت تماما من الشارع، تدوّر مهما تدوّر حواليك مفيش أى طاقة إيجابية.. أصل هتيجى منين، الظروف صعبة، ومش باين لها حل قريب، والله أعلم إذا كان فى أمل بعيد ولا لأ.
زمان كان يقولك فى نقطة نور فى آخر النفق، دلوقتى أنت مبقيتش بتسأل على نقطة النور، بقيت بتدعى ربنا إن النفق ما يقعش على دماغك، بس مش مهم، مطلوب منك تتفائل، وتضحك، وتبث طاقة إيجابية فى نفسك وفى اللى حواليك.. بتعرف تبث؟!.. بث، ما بتعرفش تبث.. هيتبث لك.
بص، إحنا خلاص هو ده نصيبنا، ما تقلبهاش غم بقى، آدى الله وآدى حكمته، أيام وبنعيشها على رأى الأغنية، لا تكشيرتك، ولا اكتئابك، ولا شيلانك الهم هتعدل المايلة، هى ماشية كده ببركة ربنا، فسيبها على اللى خلقها، واعمل اللى عليك، واشتغل واسعى، واقعد ع القهوة شكك، واضحك ع النكت البايخة القديمة، علشان حتى النكت خلصت.
زمان الجنيه كان بيغلب الكارنيه، دلوقتى الجنيه ألف رحمة ونور عليه.
تم أضافة تعليقك سوف يظهر بعد المراجعة