مبروك لمصر التأهل لمونديال روسيا بعد غياب 28 سنة، مبروك للغلابة فى البيوت وقدام الشاشات وعلى المقاهى وفى الاستاد طبعًا، مبروك للشباب اللى بكوا بعد ما الكونغو اتعادلت فى الدقيقة 86 من المباراة وقتلت الماتش تقريبًا، ومبروك لكبار السن اللى ارتفع عندهم الضغط والسكر طول الماتش، ومبروك للأمهات اللى كنا متعلقين بدعاهم وكلمة يا رب على لسانهم.
افرحوا وهيصوا يومين تلاتة عشرة، زيطوا فى الشوارع بالعربيات والموتوسيكلات، وارفعوا أعلام مصر الحبيبة، هنوا بعض وارجعوا اتلموا مع بعض حوالين بلادى بلادى، لكن لازم نعرف ونفهم إن الفوز اللى اتحقق بفضل دعا الوالدين وبركة الموهوب محمد صلاح مش لازم ينسينا الحقيقة، ومش لازم يخلينا نتجاهل الأخطاء الجسيمة اللى ارتكبناها، واللى نقدر نصلحها قبل ما نروح روسيا، بشرط إننا نتسلح بالشجاعة والروح العملية اللى تخلينا نبدى مصلحة بلدنا على أى اعتبار تانى.
هلا هلا ع الجد والجد هلا هلا عليه، أول حاجة لازم يعملها هانى أبوريدة واتحاد الكورة بعد صرف المكافآت لجهاز المنتخب واللاعبين، إنهم يجتمعوا مع مستر كوبر وجهازه المعاون، ويتفقوا معاه إن ماتش غانا الجاى فى ختام التصفيات هو ماتشه الأخير مع المنتخب، بكل ذوق واحترام، شكرًا يا مستر كوبر إنت أديت مهمتك وخدت مستحقاتك كاملة، لكن إحنا لينا حسابات وطموحات تانية فى المونديال أكبر من التمثيل المشرف، وخوض التصفيات والعودة من موسكو بالهدايا.
عيب أن يبقى طموحنا إننا ننهى شماتة وتلسين مجدى عبدالغنى بأنه صاحب الهدف الوحيد فى كأس العالم، عيب أن منتخبنا يبقى مرتعش ومش مركز وتايه فى الملعب وخايف من أصغر فرقة ممكن يقابلها، وعيب كمان إننا ما نشوفش غياب الروح والثبات فى الملعب، ونغطرش ونقول إن الكوتش اللى وصل الفريق للمونديال لازم يكمل معاه، غلط كبير إننا ما نعرفش إحنا عايزين إيه، أو نسيب مقدراتنا للعشوائية فى الإدارة.
كلكوا شايفين المنتخب والأداء الباهت فى جميع مبارياته، لأن الروح القتالية ناقصاه، والتناغم بين اللاعبين غايب، والخطوط مفككة، والفرص السهلة بتضيع، ومفيش حلول تكتيكية شايفينها فى الملعب، ومفيش أى بصمة للمدرب، اللهم إلا طريقة ارجعوا واتكربسوا فى نص ملعبكم، وده مش كلام إطلاقًا، إحنا محتاجين مدرب مصرى عنده فكر وروح وحاسم ومتحمس إنه يعمل حاجة، ويقدر يبنى فريق بسرعة، ويقدر كمان أن ينقل روحه القتالية للاعبين، والمواصفات دى مش موجودة حاليًا غير فى حسام حسن .
حسام حسن يقدر يفلتر المنتخب، ويختار اللاعبين المحليين الأفضل من بعض المحترفين، وعنده الشجاعة والقدرة والفكر الخططى اللى يقدر بيه يقطع شوط فى المونديال أبعد من التصفيات، وإنتو يا اتحاد الكورة عارفين الكلام ده أكتر من أى حد تانى، فملهاش لازمة المقاوحة فى الباطل أو المجاملة على حساب مصلحة البلد.. اللهم بلغت اللهم فاشهد.
عدد الردود 0
بواسطة:
وائل
مباريات المنتخب كلها أخطاء ... واتفرجوا على تحليل on اسبورت
الراجل بوظ شكل واداء المنتخب وبعد ستةوعشرين مباراة مع نفس اللاعيبه وبنفس المدرب لسه المنتخب مفيش فيه اي انسجام ولا تناسق في الهجوم ولا الدفاع افهموا يا بني ادميين ... !!! حد شاف منتخب كروتيا او السعودية او كوستاريكا انتوا راحيين كأس العالم يا كوبر يا ابوريدة يا اي حد .... هل من منادي !
عدد الردود 0
بواسطة:
طارق
وايهاب جلال فين
أنا متفق مع سيادتك على المدرب المصرى لكن مختلف على اختيار حسام حسن فين ايهاب جلال من الحسبة دية وكمان هو مرشح للمنتخب الاولمبى
عدد الردود 0
بواسطة:
محمد عشري
آه لو قابلنا ألمانيا !!!!!!!!
قلت هذا الكلام أكثر من مرة. بلاش ياسيدي حسام حسن علشان الأهلي غضبان عليه. عندك عدد كبير من المدربين المصريين: 1- محمد يوسف 2- طارق العشري 3- طلعت يوسف 4- حسام البدري 5- بإختصار أي مدرب مصري لكن مستر كوبر عيب يكمل. ما هو أنت لعبت في أرضك وفي الدقيقة 87 دخل فيك هدف. كان ممكن ألا نحرز هدف ثاني إذا تغاضي الحكم عن ضربة الجزاء.
عدد الردود 0
بواسطة:
Adel
لا اتفق معك
مع كل تقديري لكاتب المقال ،الا يكفي ان كوبر ثاني افريقيا وصعد لكأس العالم ان احترمه وارفع له القبعة كعبقري تكنيك ،مدرب تحدي الافارقة بالإمكانيات الموجودة ليه المطلوب منه اكتر من كدا اعتقد انه لازم يكمل
عدد الردود 0
بواسطة:
السويسى
كوبر متى ستهاجم ؟
أنا مع كاتب المقال قلبا" و قالبا" كوبر لو إستمر على عناده يبقى نقوله شكرا" و مع السلامه ، هل نسينا ماذا قال مدرب أيرلندا عن الجوهرى فى سنة 1990 لقد قال هل هذا فريق قادم لكأس العالم ليدافع تسعون دقيقه ، هل نسينا من السبب فى عدم إمساك حارس المرمى الكرة التى يتم إرجاعها إليه بيده أليس المدرب المصرى و الذى حرص على تنبيه لاعبيه بإرجاع الكره من منتصف الملعب لحارس المرمى ؟ الفريق المصرى ساهم بأفعاله تلك لتغيير بعض قوانين اللعبة التمثيل المشرف أمر مرفوض يا بهوات . حسام حسن هو الحل ، وتخيلوا شيكا بالا بجوار صلاح و مصطفى فتحىو باسم مرسى و حسام غالى بدلا" من صالح جمعة والننى أبو ضفاير اللى خايف عل رجله كان فيه فاول بالقرب من خط المرمى و بجوار خط الثمانى عشر و تقدم إليها محمد صلاح و اعطاها هديه للننى التايه خاف على رجله و تركها ، أما رمضان صبحى و الكتكوت عمرو جمال و الخرم الشناوى و الجول كيبر شريف إكرامى فنقول لهم شكرا" و إتمرنوا كويس علشان الدورى فقط و كفانا عشوائية فى الإختيارات للمنتخب . بقى محمد عواد بره و الشناوى جوه إيه العند ده؟؟
عدد الردود 0
بواسطة:
القاهرى
الآمال والواقع
ضحكت كثيرا من كافة الردود السابقة عندما نقابل ألماني وحسام واسماء أخرى دى اسمها فرد عضلات كوبر دخلنا المونديال واى عاقل يعرف أن هذا هو منتهى أملنا أما الأحلام فواضح أن من يحلمون بها لم يروا الكرة الأوروبية ، أن مشاركة المنتخب فى المونديال يؤكد عدة حقائق هامة وهى أننا الأفضل على كافة الفرق التى واجهناها ن أن المدرب استطاع أن يعرف مواطن الضعف والقوة فى المنتخب ، أن الخطط التى لعب بها هى الأفضل فى ظل مقومات الفريق ، وأن التمثيل فى كأس العالم شرف لنا سعينا كلنا لتحقيقه فلا تحرموا من شارك فى صنع الفرحة من المشاركة بها ، شرف لأى مدرب مصرى أن يشارك فى قيادة الفريق خلال كأس العالم ، ولكن أين الحنكة والتعقل فى استخدام القرار من عصبية حسام حسن وتنطيط ميدو وغضب غيره الغير مبرر أرحموا عقولنا من الترهات وأفيقوا
عدد الردود 0
بواسطة:
طارق
عبد الرحمن فوزى صاحب هدفين فى كأس العالم
مجدى عبدالغنى ليس صاحب الهدف الوحيد فى كأس العالم فقد سبقه بسنوات المرحوم عبد الرحمن فوزى الذى أحرز هدفى مصر فى مرمى المجر فى كأس العالم فى المباراة التى جمعت بينهما يوم 27 مايو 1934 فى نابولى وفازت فيها المجر 4:2
عدد الردود 0
بواسطة:
السيد
الفريق القومى
اداء وخطط وتوظيف المدرب للاعبين سىء وارشح كابتن عبد العزيز عبد الشافى
عدد الردود 0
بواسطة:
السيد
الفريق القومى
عبد العزيز عبد الشافى او حسام حسن او الاثنين لتدريب المنتخب
عدد الردود 0
بواسطة:
النبيل
الا حسام حسن
حسام حسن عصبى الى حد البلطجة ولن يستطيع التعامل مع نجوم اعتادت التعامل بتحضر ورقى فى الاندية الاوربية امثال صلاح والننى وكوكا -- اسالوا ماذا فعل حسام حسن مع لغيبة منتخب الاردن وكيف سب احدهم وضربة ايضا -- حسام حسن واخدها عافية والاهلى كشف حكاية التريمادول