البلد دى مش هيبنيها إلا ولادها المخلصين، اللى عارفين مشاكلها ومتحملين معاها اللحظات الصعبة وعندهم أمل وإرادة إنهم يطوروا نفسهم ويتقدموا معاها، مش المجموعات اللى قاعدة تهرى على مواقع التواصل الاجتماعى فى كلام فارغ وتنظيرات تكشف عن جهل وسخرية عدمية.
المبادرة الشبابية اللى أطلقها شباب شبرا الخيمة تحت اسم «طور شارعك» لتنظيف وتهيئة شوارع المناطق العشوائية قبل فصل الشتاء، حتى لا تتحول إلى برك من طين، تساوى كام بوست عدمى وساخر ويائس من اللى بنشوفهم على «فيس بوك»؟ شباب إيجابى وكادح قرر إنه يتحرك ويخدم بلده مش بالشعارات، ولكن بتحسين المنطقة اللى عايش فيها والتعاون مع الأجهزة التنفيذية فى سد أى نقص ومواجهة التقصير فى الخدمات، بالتأكيد مفيش روح أفضل من كده ومفيش جهد مخلص أفضل من جهد هؤلاء الشباب، وعلى جميع المسؤولين فى الأجهزة التنفيذية والإعلام التفانى فى دعم هؤلاء الشباب وإبرازهم ليكونوا نموذجا ومثلا لغيرهم، عشان بلدنا تتقدم بينا كلنا.
ما يحدث فعلا على الأرض فى شبرا الخيمة إن الشباب المتحمس لمبادرة طور شارعك قدر يخلق وعى جماعى لدى الأهالى وينقل لهم حماسهم، وإزاى هتتغير حياتهم للأحسن بعد نجاح المبادرة، وكمان قدر يقنع رئيسة الحى إنها تساند المبادرة وتدعمها بتشكيل لجنة تضم كل الوزارات المعنية لتدعيم البنية التحتية للشوارع وتأهيلها قبل فصل الشتاء، لكن البيروقراطية بتاعتنا لازم تفرض نفسها، عمال حى شرق بيسيبوا المنطقة ويمشوا أول ما رئيسة الحى تغادر المكان واللجنة المشكلة من الوزارات المعنية بطيئة وليست على قدر حماس الشباب والأهالى والالتفاف من نواب الشعب ورجال الأعمال حول المبادرة ليس على المستوى المأمول.
نتيجة عدم التفاف المسؤولين والمعنيين بشكل كامل حول المبادرة، الأهالى بيتكلفوا فلوس كتير لتأجير المعدات اللازمة لتأهيل الشوارع ورصفها، رغم إنها متوفرة لدى الحى، واستجابة شركات الكهرباء والمياه والصرف لإصلاح الأعطال أثناء العمل بطيئة رغم تشكيل الحى للجنة تضم كل الوزارات المعنية لهذا السبب، يعنى كسر فى ماسورة مياه متهالكة أو عطل فى كابينة كهربا ممكن يعطل المبادرة أيام، وكأننا بنصدر اليأس للناس اللى مستعدة تقدم جهدها ووقتها وفلوسها لخدمة بلدها.
يا جماعة الخير، كفاية بيروقراطية وتكاسل ولامبالاة، مبادرة زى «طور شارعك» اللى بدأها مجموعة من شباب شبرا هى الأمل فى إن كل المصريين يشتغلوا لمصلحة بلدهم، فوقوا وتخيلوا لو المائة مليون اتحركوا زى الشباب دول ممكن بلدنا تبقى شكلها إيه وفى قد إيه؟ ساعدوهم وإوعوا تطفوا حماسهم واستعدادهم لخدمة بلدهم لأنهم فعلا النموذج والمثل اللى لازم الناس كلها تقتدى بيه.
تم أضافة تعليقك سوف يظهر بعد المراجعة