صباح الفل، عندى ليك خبرين، خبر حلو، وخبر وحش.. تحب نبدأ بإيه الأول؟!
نبدأ بالخبر الحلو.. ولا أقولك خليهم خبرين حلوين، الأول إن السياحة الروسية راجعة مصر تانى يوم 23 فبراير الجارى، يا مرحب بالخواجات يا مرحب، الخبر الحلو التانى إن مش الروس بس، وإن شبكة «سى إن إن» قالت إن مصر جاءت بين أفضل 20 وجهة مفضلة لدى السياح فى العالم فى 2017، بجانب إندونيسيا وجورجيا وكندا والبرازيل.
رجوع السياحة خير مالوش أول من آخر، عملة صعبة، وسمعة حلوة عالميًا، ومؤشر بنجاح مصر فى القضاء على الإرهاب، وفتح بيوت، وشغل لملايين المصريين ممن تضرروا من توقف السياحة.
عاوز الخبر الوحش.. هو مش خبر قوى بس عاوز أقولك إن إحنا كمصريين مش مستعدين لاستقبال رحلة مدرسية من مدرسة الدلنجات الإعدادية المشتركة، مش وفود سياحية، تقدر كده تقول كمان إن ملناش فى النعمة.
طب أنت شايف إن سرقة سواقين التاكسى، واللعب فى العدادات تجيب سياحة؟!.. ولا بلطجة «سياس» الهرم تجيب سياحة؟! ولا فهلوة واشتغالات بياعين خان الخليلى وتسول المتسولين وحالة المرور والطرق والنظافة وتدهور المتاحف، وانهيار الخدمات بالمواقع الأثرية يجيبوا سياحة؟!
الحمد لله، السياحة رجعت، والخواجات جم، إيه بقى؟!.. يلا بينا ننصب عليهم ونشتغلهم ونطفشهم، المصرى معروف بجبروته.
تم أضافة تعليقك سوف يظهر بعد المراجعة