د. صبرى إسماعيل يكتب: إلى اليتيم

ودّع سنين اليُتم واِهتف بالأمل

واملا حياتك بالكفاح ----حُب وعمل

واِنسى الآهات واِنسى اللى فات

وانسى آلام الذكريات

تَبّت فى ذِكرى طيبة

دا الناس حياتها مقلّبة

ياما ناس معاهم أهلهم على كترهم

عايشين فى قمة ذُلّهم

ليهم كتير لكن كأنّه ما لِهم

********

عمر ما كان اليتم عيب ولا شىء غريب

أعظم يتيم سيدنا النبى أغلى حبيب

كان الأمين ونشر بنور الحق دين

لأهل طيبة الطيبة ولمكة والناس أجمعين

******

قوم وسيبك م الضباب واجتهد وافتح كتاب

عيش فى دنيا ليها ألف باب

ما حد فيها هيسألك دا الخلق دايرة فى فلك

واحلم تكون زيّى طبيب

أو جامعى أو حتى ع الجبهة نقيب

أو محترف زى حسـام

أو غاوى فن وهات وسام

يمكن مذيع أو صحفى أو ناقد بديع

أو حِرفى تتقن صنعتك

****

خلّى كفاحك دنيتك

وابنى من اليوم أسرتك

وتعيش سعيد مولود جديد

نحلم ببكرة كلنّا وفرحة واحدة تلمّنا

ولمّا ِتزعل برضه فضفض

لأى واحد مننّا

لأننّا

إحنا جميعاً مؤمنين

ولرب واحد مخلصين

جينا جميعاً من تراب

وإليه نعود سالمين