جمهور الأهلى طالب المايسترو بالاعتزال.. والعمل فى المنتخبات ملاكى للأهلى والزمالك فقط
الإعلام ظلمنى.. ولعبت أولمبياد طوكيو بأوامر المشير.. وأبو تريكة "مردش" الجميل للترسانة
الزمالك كان خرابة قبل مرتضى منصور.. وتغيير المدربين خرب الدنيا فى القلعة البيضاء
كسبنا الأولمبى بالثلاثة بدون مدرب.. على قنديل أشتغل فى الأهلى "مكافأة" على ظلمه للترسانة
الخواجات قالوا للخطيب أنت بتتعالج فى مصر غلط.. وأحمد الكأس كان خليفتى فى الملاعب
ماذا عن حكاية مصطفى رياض مع الكرة منذ البداية؟
بدأت صغيرًا، حيث كان أبى يعمل فى ورش الترسانة، بينما كنت ألعب الكرة الشراب فى شوارع بولاق بعد صلاة الفجر وحتى الصباح، فأخذنى إلى النادى بدلًا من الشارع، وكان وقتها مكان السيرك، لعبت فى الفرق قبل المباريات وكانت الناس بتشجعنى لما أجيب أجوان واتدرجت فى الترسانة وكنت مش بخاف من الجماهير لأنى متعود عليهم، وانضميت للمنتخب وشاركت فى أوليمبياد طوكيو وكسبنا كوريا 10/6أنا لوحدى جبت 6 أهداف.
مصطفى رياض
أين الحقيقة فى أزمة هدافى الدورى؟
حسن الشاذلى هو هداف الدورى المصرى تاريخيًا، ويليه حسام حسن، ثم مصطفى رياض، والضظوى، ومن بعدهم الخطيب، فحسام حسن تخطانى لأنه لعب سنين أكتر مننا.
.jpg "حوار-الكابتن-مصطفى-رياض--عمرو-مصطفى--1-4-2017-(18)")
مين ظلمك؟
اتظلمت فى الإعلام، أنا مش بحب أروح لحد، وأنا بلعب كنت مظلوم، وكنت بجيب أجوان محدش كان بيتكلم عنى، سواء مع الفريق أو مع المنتخب، كنت هداف دورة طوكيو ولم أحصل على تعريفة واحدة، ولحد الآن أنا الهداف الرابع، ولا فى أى حاجة بتتكتب عنى.
أول مرتب أخدته من الترسانة؟
مرتب!!! إحنا لما خدنا الدورى موسم 1962/63، كان كل لاعب له جنيه واحد فقط يوم المباراة، ووقتها محمد حبيب وقتها كان رئيس المحلة، وعزم الفرقتين، والنادى رصد 15 جنيه مكافأة الدورى العام، لقينا المبلغ 14 بس، سألنا قالوا المجلس أمر بـ14 بس عشان الجنيه مش هتاخدوه عشان اتعزمتوا فى المحلة.
.jpg "حوار-الكابتن-مصطفى-رياض--عمرو-مصطفى--1-4-2017-(12)")
ومكافأة كأس مصر فى الستينيات اتقسطت على 3 أقساط، وأيام الحروب كان فى ماتش فى السويس دورى ومفيش فلوس، وقتها ولا مليم، فسألنى عبدالله وهبة سكرتير النادى محدش معاه فلوس فقلته معايا 600 جنيه فى البيت قالى الحقنى، ادتهمله، وسافرنا ولعبنا، وكسبنا الماتش، ولم أخد الفلوس إلا بعد سنة.
ماذا عن مواجهات الترسانة والأهلى؟
فى مباراة أمام الأهلى كانت هتحسم بطل الدورى، إذا كسبنا نأخده للمرة الثانية، ولكن الحكم كان لكن زنكالون، لغى هدف لمحمود عوض لاعب الترسانة، وانتهت المباراة بالتعادل والأهلى فاز بالدورى ظلم.
هل التحكيم كان بيساند الأهلى والزمالك؟
الحكام كانوا بيتأثروا بالجمهور شوية، فالترسانة عنده جمهور لكن جمهور منازل مش بيروح ماتشات غير فى ميت عقبة، لكن برة لا.
لما أخدو مننا الكأس قبل الماتش اجتمعنا، وعبدالحميد إسماعيل، قال شدو حيلكم قلت مش هنكسب، قال طب هتلعب ليه؟ قلتله الترسانة مقارنة مع الأهلى، الأهلى معاه الصحافة والجمهور وحاجات كتير، لكن لو الترسانة كسب أو خسر مفيش مشكلة، أما الأهلى لو خسر هتبقى كارثة، فعلا كسبونا.
هل التحكيم كسب الأهلى؟
الله يرحمه على قنديل، بعدها بشهر اشتغل شهرين مدير عام للنادى كمكافأة من عبدالمحسن مرتجى.
.jpg "مصطفى رياض (3)")
كام بطولة الترسانة كان يستحقها وخسرها؟
الكأس والدورى أمام الأهلى، فعلى قنديل فى الكأس ألغى 3 أهداف، خلال المباراة، فطلبت من الحكم يطردنى وهو رفض، أما زنكلون فألغى هدف فى الدورى.
هل مقتنع بالسحر فى الملاعب أو واجهتك فرق بالسحر؟
كان فى ناس بتقولى مش عارف مين عاملك عمل وأنا مش بحط فى دماغى، لكن مفيش ولا سحر ولا شراء مباريات ولا تفويت.
ما سر لقب الغزال مع مصطفى رياض؟
ياه من زمان كان الجمهور بيسمينى الغزال الأسمر عشان كنت سريع، إبراهيم يوسف قالهم إن الغزال هو مصطفى رياض، ومصطفى يامصطفى اتقالت لى قبل ما تتقال لمصطفى عبده.
ما تعقيبك على تعاطى اللاعبين للترامادول؟
اللى بياخد ترامادول ناس مجانين، أنا كنت بجنن الخواجة مش بجرى اتمرن ووقت الاحماء مش بجرى اعمل تقسيمة وألعب انشالله 3 أو 5 خمس ساعات.
الترسانة والترامادول، ورد فعلك بعد اعتراف المدير الفنى على لاعبى الشواكيش؟
أنا سمعت لكن مشفتش حاجة، ولما سمعت اتضايقت، ومكلمتش حد فى الإدارة أو اللاعبين لأن الكل سمع من غير مايشوف.
رأيك فى عدم حضور الجماهير للمباريات؟
بدون طعم مثل الطعام بدون ملح، ولا ليها لزمة، هى أم كلثوم ينفع تغنى من غير تفاعل الجماهير معاها؟؟ بس الجمهور هو اللى عمل فى نفسه كده بسبب تدخل بعض الأطراف بين الجماهير والرياضة.
.jpg "مصطفى رياض (4)")
ماذا عن بدايات أبوتريكة فى الترسانة؟
كنت أنا والشاذلى ماسكين الفريق، وأنا دربته، جه النادى وهو صغير كان عنده 11 سنة، وابتدى يتمرن، وكان باين من البداية أنه لاعب كويس، وفى الفريق الأول كان واضح أنه أفضل لاعب فى الفريق، لكن فى ال÷ألى 11 لاعب كويسين، فكلهم بيخدموا على بعض، وكان فى موقف بينه وبين الإدارة عشان الفلوس، فى لائحة أن اللى يقعد 5 سنين من حقه يمشى، وهو كان باقى له نص موسم، وطلب يمشى، وهما رفضوا، فقال هقعد بس لما أجى امشى مش هتاخدو فلوس فأحسن توافقوا على رحيلى.
كيف انتقل أبوتريكة للأهلى؟
كان اسمه بيتردد والناس بتيجى تتفرج عليه سواء أهلى أو زمالك، وكان هيروح الزمالك ويوقع على الانتقال إلى القلعة البيضاء، الأهلى تفاوض معه ولكن تم الاختلاف على 100 ألف جنيه، فالخطيب عرف أن الزمالك هياخدوه، فكلم أبوتريكة، وقاله تعالى، فاللاعب قاله الخلاف على 100 ألف، راح الخطيب كلم أحد أعضاء الأهلى من رجال الأعمال وقاله إن فى مفاجأة وباقى ليها 100 ألف، ورجل الأعمال دفع الشيك واتراضى وراح تريكة للقلعة الحمراء.
هل تريكة أعطى الترسانة؟؟
هو إدى الأهلى، ولكنه لم يرد الجميل للترسانة، وهذا يؤخد عليه، فى الوقت اللى احنا فى أزمة كان المفروض يقف جنب النادى، والترسانة ميقدرش يطلب من أى لاعب، أنا لما سلفت النادى فلوس رجعوها ومعاها جواب شكر، هومفكرش، رغم أن النادى خدمه وطلعه وعرفه كل حاجة، المفروض يحفز اللاعبين أو يسأل مسؤولى النادى أو دفع مبلغ مالى لدعم النادى.
ماذا عن ما يحدث مع تريكة؟
لم أكن أتمنى أن يكون فى هذا الموقف، هو رياضى ليه يدخل نفسه فى السياسة.
ماتش عمرك ماتنساه؟
ماتش الإسماعيلى فى الكأس كان عندنا فى ميت عقبة، وبعد ماتش الدورى، اللى هما أخذوا الدورى وكسب 3/2 ماتش الدورى، وإحنا كسبناهم 2/1 كان «تار» بالنسبة لنا، وماتش تانى كان مع الأوليمبى، والمدير الفنى للترسانة فؤاد صدقى كان على خلاف مع اللاعبين، ولم يحضر التدريب قبل المباراة، ولم يحضر يوم الماتش، ولعبنا وكسبنا 3/0، بدون مدرب وأنا كنت بدير المباراة، وخلال الماتش نشاور اللاعبين الاحتياطى نقولهم سخنو، ونجرى التبديلات.
هل اللاعبين كانوا يمثلون قوة؟
طبعًا، بس بدون تجاوز فى المدرب، والجماهير كانت تدرك ذلك، فكان جمهور الأهلى بييجى يشجعنى لما نلاعب الزمالك، والعكس صحيح.
ما علاقتك بأهل الفن؟
فؤاد المهندس لما عرفت أن بيته اتحرق فى الزمالك أول واحد رحتله واطمنت عليه وقابلته، وكمان صلاح ذو الفقار كان بيحبنى جدًا، وعادل إمام صاحبى، كنت أما أعرف أنه فى بولاق كنت أروح أسلم عليه، وكمان سعيد صالح.
كم مرة اعتزلت وعٌدت مرة أخرى؟
مرة واحدة بس، أنا اعتزلت عام 76/77 أنا والشاذلى لقينا إننا مش هنقدر نفيد الفريق تانى، وبعد الاعتزال بشهر، كان الفريق هيهبط، وكبار النادى اجتمعوا، وكلمونا نتدرب وقعدنا معاهم، وطلبنا سؤال اللاعبين عن عودتنا مرة أخرى، وفى ناس اعترضت وقتها، ولكن الأغلبية وافقت، وبالفعل شاركنا، فى 6 مباريات وأحرزت خلالها ستة أهداف، ما عدا مباراة الأهلى لم نلعبها، لأن الأهلى عملنا مباراة الاعتزال فى ملعبه، دون مقابل، واستقبلونا، فلازم نحبهم، فنلعب ضد الأهلى ليه!
هل تلقيت عرضًا للعب فى الأهلى أو الزمالك؟
فى الأيام الأخيرة، اتلقيت عروضًا منهم، ولكن زمان كان اللاعب زى المؤبد، ميخرجش من النادى، واللاعبين اللى بيتنقلوا بيبقى بالتراضى بين الناديين، لكن احنا فى الترسانة كنا مؤبد.
هل الترسانة أعطاك حقك مقارنة بتاريخك؟
هههه ده المجلس عاوز يمشينا، أنا قاعد هنا فى قطاع الناشئين بالعافية، يعنى أنا والشاذلى بيكرمونا بالكلام، لأن إذا ذٌكر الترسانة ذٌكر الشاذلى ورياض.
كيف ترى عماد متعب فى الأهلى؟
صعبان عليا متعب، من الفراودة الممتازين فى مصر، ونصيحتى يسيب الملعب قبل ما الملعب يسيبه، عشان يسيب ذكرى طيبة.
ما حكايتك مع صالح سليم؟
فى ماتش أمام منتخب القناة، وكان فى الأهلى، اتشتمت كتيير من الجمهور، ووالدتى كانت متوفية، لقيت صالح سليم بيطبطب عليا فى غرفة الملابس وبيقولى أنت أحسن من كده وبلاش تسمع اللى حواليك اعمل اللى أنت عاوزه هتبقى كويس، وجبت جون وكنت أحسن واحد فى الماتش.
.jpg "مصطفى رياض (2)")
لما كان هيعتزل قال هلعب جنب الشاذلى ومصطفى رياض فى الترسانة، كان الأهلاوية عاوزينه يبطل كورة، فى ناس قالو مينفعش أنت كابتن الأهلى، وكل أما أروح الأهلى ألاقيه فى النادى بحب أسمع كلامه، عملت العضوية وأنا لاعب وقتها بـ105، واللى خلانى عملتها شوقى عبدالشافى، لكن الزمالك عملتها بـ400 جنيه.
مجلس إدارات الأهلى؟
اللى نفع صالح سليم فى إدارة الأهلى إنه لعب كورة، والخطيب كمان.
التحكيم ظالم أم مظلوم؟
لا مش ظالم فمثلا ركلة جزاء جريشة هو مش شايفها، فغصب عنه، وعموما أى فريق عاوز يكسب.
ذكريات مع الخطيب؟
قابلته فى لندن كنا بنتعالج هناك، وقعدنا مع بعض 15 يوم، الدكتور وقتها قاله أنت بتتعالج فى مصر غلط، و«هيديكوتى» كان عاوز يلاعبه وخلاص وده اللى خلاه يبطل بدرى.
كيف ترى رئاسة محمود طاهر للأهلى؟
أخلاقه عالية بيحب النادى وأى رجل أعمال هيقف جنب النادى.
وماذا عن تجربة كوبر مع المنتخب؟
كوبر بيلعب بطريقة تناسب اللاعبين اللى عنده، وعلى قد الإمكانيات وعلى أد المستوى.
مرتضى منصور؟
عمل حاجات كتير، الزمالك كان خرابة، لما قابلت مرتضى قلتله، عمل حاجات متعملتش قبل كده، لأنه بيحب الزمالك، وقلبه أبيض وبيحب الناس، والنادى دلوقتى ممتاز، ومنصور عمل نادى الزمالك.
ليه مدربتش المنتخب أو الأندية؟
زى ماكانوا زمان بيستعينوا بلاعبى القطبين، دلوقتى المدربين فى كل المنتخبات من الأهلى والزمالك، النص بالنص، وأنا الحمد لله صحتى دلوقتى كويسة خلينى بعيد أحسن.
مين خليفتك فى الملاعب؟
اللاعب اللى رايح للجون وعارف إنه هيسجل جول، مثل أحمد الكاس.
مين المهاجم اللى كنت بتشوفه فى وقتك؟
عبدالعزيز عبدالشافى مش هيتعوض تانى، وأنوش بتاع الإسماعيلى
حسام حسن وتجربته التدريبية؟
حسام حسن لازم يبطل عصبية نفسى ميبقاش عصبى وياخد الأمور ببساطة وهو بيعمل اسم تانى وهو مدرب وده ممتاز.
وبالنسبة لميدو؟
لازم ينسى اللى كان فيه هناك، مصر وضع تانى، وابتدى يبقى هادى.
وحسام البدرى؟
ماشى كويس ومحبوب لو اللاعيبة حبت المدرب الحكاية هتظبط معاه، هو ابن الأهلى وعاوز يجيب بطولات.
وماذا عن باسم مرسى؟
باسم مرسى لازم ينسى نرفزة الملعب ولازم يبطل مشاكسة ولازم يفكر.
طب ومحمد صلاح؟
بشوفه مع روما بيجرى بأقصى سرعة، هو لاعب هايل، لكن مع المنتخب بيبقى متبرجل مش عارف ليه.
رأيك فى تغيير المدربين بالزمالك؟
غلط وده اللى مبوظ الدنيا، كل شيخ ليه طريقة.
من هم رموز الأهلى والزمالك أثروا فى حياتك؟
صالح سليم والفناجيلى، وعلى محسن فى الزمالك، وحلمى زامور، وصلاح الشاهد ومحمد ياسين.
كلمنا عن حياتك الشخصية؟
أمى توفت فى بداية المشوار، وأخوتى وأختى توفوا فيما بعد، كان نفسى أمى تشوف نجاحى، لكن دلوقتى عندى ابن اسمه حسام، بعيد عن الكرة.
أين تقضى وقتك؟
بحب اتفرج على التليفزيون خاصة أفلام الأكشن.
كيف ترى تكريم الشاذلى؟
إحنا مخدناش حقنا، أدينا الترسانة لكن مخدناش حاجة، وعاوز أقول للشاذلى افتقدتك وواحشنى ونفسى أشوفك.
أمنية تتمنى تحقيقها؟
نفسى الترسانة يبقى كويس وبدعى فى صلاة الفجر.
تم أضافة تعليقك سوف يظهر بعد المراجعة