ما تقولى يا ابا الحق فين
والناس دى مالها متفرقين
النص رايح للشمال
والباقى ماشى فى اليمين
الناس دى مين؟
والناس دى مين؟
مين اللى حب يكون وضوءه بدم أحمر؟
مين اللى يا ابا بس خرب ومين بيدمر؟
ومين اللى مات؟.. يكون غريب!!!
مترد يا ابا الوقت أخر
صوت الأذان عمال يكبر
وأنا رايح أصلى وأكيد راح أدعى
يا رب تهدى الجميع فى بلدى.. ما أنت اللى تقدر
الخير كتير بس النفوس مش يا ابا صافية
هيا الفلوس تبقا السبب.. طب جاتها خافية
المشكله أن اللى باع كان بالرخيص
وإن الشياكة عمرها ما كات فى بدلة أو قميص
مين اللى دلك ع الحرام إنه حلال
وإن اللى يقتل مش خسيس
إياك تفكر إن ممكن يبقا يوم..الملح سكر
كان غيرك أشطر
طب كان يدلك ع اليهود والأقصى بيبكى
والا أنت لمبة فى العمود بيقدها عبرى
خليك جبان بيحركك يمين شمال
وساعة الخطر.. هيقولك اجرى
لساك مصمم تبقى ماسكر
اخلع بقى توب الشيطان لو كنت تقدر
دا الأرض محتاجة العرق مش دم أحمر
تقبل بأنك تتشنق
والا تعيش على أرضها تبنى وتعمر
قدامك أنت الاختيار ما بين لونين
أحمر وأخضر
